CARLITO MANTUA

Brgy. Lao. Ormoc City, S. Leyte

Angay ba kahang

ihabol mo

ang pagkamalimtanon

sa mga saad ta nga

gitisok sa

tabunok nga kaadlawon?

Angay pa bang mangulihad

kag balikas sa

gipugas

tang liso sa kusog

ug hangos

binisbisan sa init

nga yamog?

Unta igo na ang pagkagiw

sa namatog nga mga galansiyang

gikan niadtong sangang inayran.

Unta sakto na ang tunglo sa mga

sunoyng hiniktan ug tinangkal

nga nagkapakapa.

Unta husto na ang panamilit

sa mga patayng bituon

nga karon giabog na sa bidlisiw

sa nagpahiyom nga adlaw.

Aron sa ingon ang sugilanon

sa napakyas tang gugma

mahinumdoman ko pa sa takna

lagpas sa kalimot.