MGA kinilong bugas, de lata, noodles, diapers ug uban ang sulod usa ka putos nga sa hinabang.

Kini ang gipanghatag ngadto sa kaigsuonang’ mga kabus nga anaa lang nagpuyo ug nangatulog sa aseras kun daplin sa kadalanan niining dakbayan sa Sugbo gikan samga good Samaritan nga kabumberohan sa Cebu City Fire Station (CCFS).

Ang kalihukan nga gipangulohan sa ilang City Fire Marshal nga si Chief Inspector Josephus F. Alburo, diin ang maong proyekto ang ilang gitawag og ‘Gasa sa Bombero’.

Diin sa ilang gipanghatag naggikan kini mismo sa ilang tagsa ka mga bulsa, aron matabangan ang kapin sa 20 ka pamilyahan.

Gihimo na kini kas-a sa usa ka semana atol sa kagabhi-on, nga gisugdan niadtong Hulyo 20 ning tuiga.

Ug gilauman nga mamahimo na kini nga regular nga gimbuhaton.

Hinuon diha sa ilang pagpanghatag, nag-agni usab sila sa mga pamilya diha sa aseras nga labing maayo gihapon kon makabalik sila sa ilang tagsa ka probinsya, kun aduna pay kabanay sa probinsya.

Gipahinumduman usab sila sa mga angay buhaton kon adunay emerhensiya, sama sa sunog ug linog.

Sa laing bahin, sa matag respondi sa atong kabumberohan sa mga dagkung sunog sa dakbayan, nakita nila ang kalisud sa mga nabiktima sa sunog.

Ug subay niini, pwede usab makahatag o mahimo nga instrument sa paghatag og hinabang ang BFP.

Aron magpadayun kini, nagpatapot ang Cebu City Fire Station og mga posters sa ilang nahimutangan kun offices nga may nakabutang, “Share a Life... We make a living by what we get, but we make a life by what we give”.

Alang sa imga hinabang ug angutana, mahimo nga motawag ni FO2 Neil Aengelo D. Macapobres sa 09058543396.

Ang ilang mga drop boxes ang nahimutang sa BFP7 Regional Office ug Cebu City Fire Station. (PR)