KAHATAGAN na og katumanan ang bucket list sa mga dapit nga buot suroyon nga libre niadtong lima ka mananaog sa “Juan For Fun 2019” sa Cebu Pacific, kay gisugdan na ang ilang adventure pinaagi a paglibot sa pipila sa mga sikat travel destination sa nasud.

Gipahigayon ang send-off party sa Dusit Thani Mactan Cebu Resort niadtong Agusto 1 diin niining ika-walo na ka higayon sa pagpahigayon sa amazing run, ang Cebu Pacific mipili nila ni Dariel Valles, agriculture graduate; Bin Nur Magangcong, Marawi siege survivor; Jeric Cabanillas, artist nga taga-Palawan; Jessica Resch, Cebuana usa ka NGO founder; ug Artus Enriquez, bird watcher.

“A week-long backpacking trip in search of destinations and activities that will cultivate a deeper appreciation for the country, as well as enrich their (five winners) own stories,” tipik sa press statement sa Cebu Pacific.

Samtang, ang inila nga Cebuano travel writer Jude Bacalso, TV host ug social media personality Joyce Pring, travel personality Kyle “Kulas” Jennermann ug celebrity/vlogger Mikael Daez, maoy magsilbing mentor sa mga young traveller.

Si Michelle de Guzman, director for marketing sa Cebu Pacific mipasabot nga ang pagbiyahe sa nagkalain-laing lugar dili lang ang pagpa-ambit sa kuha nga hulagway aron makakuha og gatusan sa LIKES diha sa social media, apan aron nga mas mapalapdan ang kasinatian ingon man ang kahibawo sa nagkadaiyang kultura sa usa ka lugar.

Gawas sa awards ug premyo nga nagpaabot alang sa maong mga batan-ong traveller, ang dili makalimtan nga kahigayonan nga ilang nasuwayan human sa adventure. (FVQ)