NIADTONG Sabado, nakabisita ming mga taga-entertainment press sa “Cebu Safari and Adventure Park” sa lungsod sa Carmen nga gipanag-iya sa bilyonaryong si Michel Lhuillier ubos sa imbitasyon ni Ms. Josie S. Pereyra.

Ang Safari ang giila karong kinadak-ang zoo sa Sugbo. Duna ni walo ka kilometro ang gilay-on gikan sa highway sa Carmen National High School.

Mga 2,000 hectares ang gilapdon sa property ni Senyorito ML apan ang 323 hectares pa lay na-develop.

Ang Safari dunay kapin sa libo ka mga mananap, sama sa mga Buaya, Orangutan, Tigre, Zebra, Giraffes, Cheetah, mga langgam ug uban pa. Duna sad ni orchids nga 800,000 to a million ang gidaghanon.

Biggest attraction

Wala pa’y grand opening ang Safari kay ongoing pa ang construction sa ilang base camp ug duna pa sad silay ipuno nga adventure rides, sama sa zip coaster, Asia’s longest Zipline (1.2 km.), sky bike, obstacle course ug uban pa.

Duna sad silay mga mananap nga coming pa, sama sa Rhino, Elephant ug Hippo.

Sa pagkakaron, mokabat na sa 500 ang mga kawani sa Safari gikan sa ilang soft opening niadtong Dec. 2, 2017.

Sa pagpahimo lang kuno sa karsada gikan sa entrance paingon sa mga pasilidad mokabat na sa P200 million ang gasto.

Way duda nga mao unya ni mamahimong biggest tourist attraction di lang sa Carmen, kundi sa tibuok Cebu.

Ang entrance sa Safari is P800 per person with free lunch. Less 50% sa mga bata nga 2 to 3 feet ang gitas-on. Pero wala na kunoy libreng paniudto sa higayon nga magsugod na ang ilang “bird show.”

Ugma, ayaw sipyata ang isyu sa Superbalita kay akong ipaambit dinhi sa Laysho ang uban pang detalye ug ang mga litrato sa klaseklaseng mananap ug attraction sa Safari.

Walay “kasal”

Dili diay madayon silang Bea Alonzo, Paulo Avelino ug Derek Ramsay sa Cebu.

To think, dire sila nag-shooting sa ilang pelikulang “Kasal” sa Cebu pero dili na madayon ang ilang promo tour.

Ang rason sa Star Cinema kay apeke na kuno sa panahon kon mangari pa sila.

Sa Mayo 16 pa man kaha ang showing ngano apeke man?

Nagsalig man gud ning Star Cinema nga kusog sila sa Cebu. Mao jud!

Basin mapareho n’ya ni sa Single/Single nga gilangaw. Unsaon kuwang na sa promotion, gidungan pa gyud sa Avengers Inifinity War. Tagam!