GIPATAPSINGAN sa EGS Team ang Emil’s Fresh Chicken, 106-98, aron langkaton ang kampiyonato sa 2019 Talisay City Mayor’s Cup Open Invitational basketball championships niadtong Miyerkules sa gabii sa Talisay City Sports Complex.

Ang panaghugpong sa mga beteranong sila si Jerkules Tangkay ug John Abad sa naghinapos nga bahin sa fourth quarter maoy naghaw-as sa EGS gikan sa peligrusong sitwasyon.

Sa pagpangulo nila ni Alfred Belande, Iron Suano, Franklyn Nailon ug Alfred Codilla, ang Emil’s nga miduwa nga wala ang duha ka bigmen, sayong miarangkada sa first quarter ug nakaposte gilayon kini og 20-9 nga labaw.

Pabilin kining naghupot sa manubela sa pagsira sa first half, 56-49. Miabag usab sa opensa sa Emil’s ang mga batan-on nga sila si Jimboy Torion ug Ike delos Reyes.

Sa third quarter nagginabsanay ang duwa, ug ning higayona, nagpulipuli ang duha ka koponan sa pagsakmit sa labaw.

Apan diha na sa naghinapos nga bahin sa fourth quarter mihinayhinay og kaamag ang kadaugan sa EGS human sunodsunod mipabuto og tres sila si Tangkay ug Abad.

Si Tangkay mipaulbo og 32 puntos, 19 ka rebounds, walo ka assists, upat ka steals ug duha ka blocks samtang si Abad mipakatap og 25 puntos ug 17 ug 14 puntos usab ang natampo nila ni Vincent Minguito ug Janjan Auditor.

Wa makatunga ang mga bigmen sa Emil’s nga sila si Alfred Amarante ug Nat Cruz sa wa matino nga

rason. Apan bisan pa sa pagpalta sa duha, nakahatag og saktong kombati ang Emil’s apan daw og sa gilupig sila sa lahutay.

Nangulo sa Emil’s si Belande, kanhi sakop sa SWU Cobras, nga may 24 puntos.

Ang Jocyn Team milubong sa Paragsa, 103-88, alang sa third place honor. (JBM)