UNSA man? Nakatuman mo sa pagpamalandong inay bakasyon sa niaging Semana Santa? Tug-an bi!

Kon sagol pamalandong ug bakasyon, mas maayo na tingali kay sa pulos na lang gyud bakasyon.

Unya, wa maglain inyong tiyan sa sobrang pagkaon og binignit, mga lagutmon ug uban pang pagkaon nga uso sa panahon sa Semana Santa? Maayo na lang!

Sa pagsulat nako niini, wa pa gyud koy natan-aw nga pelikula bisan pa nga nagplano ko nga makakitag bisan usa lang. Naa ang Pacific Rim, Never Not Love You, Easy Player One, Tomb Raider ug uban pa.

Sa mga mahiligon sa pelikulang Pinoy, may umaabot pa gyud nga pelikula ang paisana nga si Kim Chiu. Morag sa ikatulong semana sa Abril kini isalida. Atangi lang.

Sa tinud-anay lang, usa ko sa mga nagplano unta nga molayat ngadto sa Boracay karong ting-init. Dugay na kini namong giplano sa akong ig-agaw sa Quezon City nga si Eric John Doños.

Ang akong pag-umangkong si James dela Cerna Phelps ug sa iyang asawa nga si Ioana nga moabot sa ikaduhang semana sa Mayo, nagplano usab unta nga moadto. Unya kay serad-an man ang isla sugod sa Abril 26, pagan ang mga plano.

Tungod kay medyo nakapangandam na, basin sa laing mga lugar sa Visayas o sa Mindanao matuman ang gihandom nga bakasyon. Anà lang.

Makalingaw paminawon ug tan-awon si Gina Lopez kon mohimog pakigpulong mahitungod sa kaanindot sa mga lugar sulod sa nasud ug sa mga kahigayonan nga matabangan nga mapatunhay ang kaanindot niini ug mapalambo ang kinabuhi sa mga lumulupyo niini.

Niadtong Martes, gilunsad sa Cebu ang Quest for Love diin ang mapili nga walo ka mga social enterprise, cooperative, people’s association, foundation, non-government organization ug ubang socially-oriented organization tabangan ug alalayan nga makahimog sustainable community-based businesses.

Ang Investments in Loving Organizations for Village Economies (iLOVE) Foundation nga gimugna mismo ni Gina maoy nagpasiugda niining kalihukan. Moabag ang mga ahensya sa gobyerno sama sa DND, DOST, DOT, DPWH, DSWD, DTI ug TESDA.

Mga inilang mga negosyante ug mga eksperto sama nila ni Anaa Meloto-Wilk, Chit Juan, Jeanne Javelosa, Reena Francisco, Illac Diaz, Marvin Agustin, John Aguilar, Czarina Medina-GuceAaron Palileo ug Marvin Beduya motabang usab pinaagi sa pagpaambit sa ilang mga kahibalo ug kasinatian.

Makita ang mga kalihukan sa programa ni Gina nga G Diaries sa ABS-CBN unya sa Hunyo. Ang mga interesadong moapil maka-download og application kit sa www.questforlove.ph.

Mahimong mangayo sa dugang kasayuran sa questforlove@gworld.ph o sa 0917-878-0032.