GATOSAN ka mga tinun-an ang nakapahimos sa labing unang jobs fair nga gipahigayon sa Lapu-Lapu City College (LLCC) sa miaging semana.

Mikabat sa 120 ka mga tinun-an, lakip na mga alumni, sa tunghaan ang na serbisyohan sa maong jobs fair nga gipahigayon niadtong Abril 5.

Gilangkuban ang maong jobs fair sa mga kompanya gikan sa mga industriya sa BPO, Hotel and Management, ug language schools.

Pipila sa mga gipangita sa mga kompanya mao ang mga Customer Service Representatives, Hotel Representatives, ESL Teachers, ug uban pa.

Naghinaot ang presidente sa LLCC nga si Dr. Eduardo Ompad nga nakatabang ang maong kalihukan ngadto sa mga tinun-an aron makakita og trabaho.

“We believe that through this activity, we might be able to help our students to find a jobs,” asoy ni Ompad.

Dugang niini nga gawas sa paghatag og de kalidad nga edukasyon, ilaha sab responsibilidad nga sigurohon nga magiyahan ang mga tinun-an sa pagkab-ot sa ilang mga pangandoy human sa ilang pagtungha.

“It is not only for providing them the quality education but, we think that it is the responsibility of the institution that as our graduates will leave the portals of our alma mater, we will be able to make sure that we will be able to guide them as they take their first step toward achieving their dream and the careers that they would like to pursue after graduation,” dugang ni Ompad. (PR)