SA TRAILER sa pelikulang Hello, Love, Goodbye nga unang panagpares nila ni Kathryn Bernardo, nakamatikod ko nga angayan si Alden Richards nga may mubong bungot ug balbas. Bugoybugoy effect.

Angayan usab kini nga ipayongyong ang buhok sa agtang.

Sa mga AlDub ug KathNiel fans nga nibahad nga mo-boycott, ayaw mo ana kay makatabang ang pagpares sa lain og molambo ang kahibalo ug abilidad sa inyong mga idolo.

Ipasundayag ang Hello, Love, Goodbye sa Hulyo 31 na.

•••

Sa dihang, wa lang damha nakakita kog kahigayonan nga makatapad ug maka-selfie ang Ms. Universe 2015 nga si Pia Wurtzbach.

Tinuod gyud ang iyang pagka “confidently beautiful with a heart.”

Mora lag way piang (gibugkosan ang iyang tuong bukton) kay nagsige lang og ngisi. Way arte.

Paglunsad sa LoveYourself Cebu ug sa LY White House nga gipaagi sa auction fashion show nga Etuf ang gianhi ni Pia.

Niadto pang 2016 nalambigit si Pia sa LoveYourself nga naghatag og libreng education, testing, counseling, treatment ug life coaching aron pagpugong sa pagkatap ug pagwagtang sa stigma sa HIV/AIDS.

Tungod sa iyang advocacy, may kompaniya sa Amerika nga gustong mohatag og tabang financial ug ang LoveYourself ang nakadawat ubos sa sugyot ni Boy Abunda.

Nanghinaut si Pia nga dunay susama nga kalihukan sa sunod tuig ug basin kuno nga sila nang duha ni Ms. Universe 2018 Catriona Gray ang motambong.

•••

Nisamot kagwapa sila si Phoebe Kaye Fernandez ug Blinky de Leon nga nag-emcee sa 25th anniversary show sa GT Cosmetics (gipangulohan ni Engr. Leonora Salvane) didto sa Robinson’s Galleria.

Hasta sab ang mga modelo ug beauty queens nga nipaso sul-ob ang mga disenyo nila ni Yoko Sato, Tata dela Calzada ug Celine Borromeo ug ang performers nga Maka Girls. GT Cosmetics gud na!