Martin: Dec. 1 na gyud, gamay na lang
GAMAY na lang pag-antos ug mahuman na ang atong kalbaryo sa 2020.
Kahibawo ko daghan ninyo ang ganahan na sad mahuman na ning tuiga tungod sa kadaghang mga bati nga panghitabo.
Apan unsa man sad kahay nagpaabot nato sa bag-ong tuig? Kon ang 2020 tuig sa mga ilaga, ang 2021 mao sad kuno ang Year of the Metal Ox (baka) nga gihulagway sa Chinese horoscope nga “a year when we focus on simplicity and rebuilding towards our goals.”
Ang United Nations mideklarar na sa 2021 isip International Year of Peace and Trust ug International Year of Fruits and Vegetables.
Suwertehon na kaha ta sa 2021? O basin mao lang gihapon o samot magdag dimal? Apan matod pa lagi sa akong mama sa buhi pa (19th death anniversary niya pag-Nov. 29), “just pray and God will do the rest.”
Ang 2021 nagbawon sad og halandumong hitabo sa atong kasaysayan kay mao ni ang 500th anniversary sa kristiyanismo sa Pilipinas. Kahinumdom pa tingali mo sa kantang Yoyoy Villame nga “March 16, 1521, when Philippines was discovered by Magellan...”
Kon wa lang ning Covid siguradong grabe gyud tingali kabongga sa atong Sinulog celebration karong Enero kay liman kag 500th anniversary. Pero sa pagkakaron kutob lang una ta sa paghanduraw. Hahaay!
TV COMMERCIAL
Sa miaging semana nag-viral sa online ang usa ka softdrink commercial tungod sa pagka-weird sa iyang konsepto. Pero morag dili na ni original kay base sa mga reaksyon nakakita na kuno silag ingon ani sad nga TV ad sa Japan.
Ang commercial nag-feature sa bata nga magul-anon nga niabot sa balay ug gikumprontasi ang iyang inahan kon tinuod ba nga sinagup ra siya.
Ang inahan emosyonal nga nitug-an sa tinuod ug gipakita ang iyang putol nga ulo diin nigawas ang botelya sa softdrink sa iyang liog ug dayong ipis sa upat ka baso nga naa sa bukobuko sa bata.
Weirdo tinuod pero alang nako catchy kaayo ug nindot ni nga commercial. Mao to siyay symbolism. Ang softdrink mao ni ang gugma sa inahan nga nipuno sa mga bakanteng baso nga nag-represent sa pagbati sa iyang anak. Dapat ipagawas ni sa TV. Tan-awa nya di ba sundon sad ni sa uban.
