ANG good news makita na ninyo pagbalik sa telebisyon ang mga paborito ninyong Kapamilya stars sama nilang Maja Salvador, Yen Santos, Korina Sanchez, Dimples Romana, Billy Crawford, Luis Manzano, Beauty Gonzales, Sue Ramirez ug Piolo Pascual.

Ang kanhi Star Magic head nga si Johnny Manahan o “Mr. M.” ang producer sa ilang mga show nga magsugod na karong Oktubre.

Ang bad news kay dili sa ABS-CBN kundi sa bag-o nilang home studio nga TV-5 nga puwerteng batiag signal puyra gaba.

GMA NAPILDI

Ang good news kay dili na madayon manangtang ang GMA-7 sa ilang mga contract worker sukwahi sa ilang naunang pamahayag.

Apan base sa taho sa Rappler napildi ang GMA sa kasong illegal dismissal nga gisang-at sa 30 ka mga cameramen batok sa Kapuso management.

Kini human nga gideklarar sa Korte Suprema nga regular employees ang mga cameramen ug entitled makadawat og back wages ug ubang benepisyo “from the time of their illegal dismissal in 2013 up to the time of their actual reinstatement.”

MISS UNIVERSE

Good news kay bisan pa sa pandemya madayon ang Miss Universe Philippines 2020.

Niadtong Dominggo, Sept. 27, nagsugod ang ilang Ring Light Series sa www.empire.ph diin dinhi makita ang journey sa mga kandidata.

Ang bad news kay dunay subscription fee nga P299 ang Ring Light Series kay ang portion kuno niini ihatag sa ilang beneficiary ug sa partner organizations.

Ay, magpaabot na lang ta sa telecast sa GMA sa ilang coronation night sa Oktubre 25, Dominggo. Libre pa!

LAKERS GYUD

Sakto gyud ang atong fearless forecast nga L.A Lakers ang modaug batok Denver Nuggets sa Game 5 or Game 6.

Way duda ang Lakers ang mo-champion karong tuiga sa NBA kay pahinungod sa kalag ni Kobe Bryant.

Kabantay mo puros 4-1 ang standing karon sa Lakers sa play-off? Si Kobe nibiya sa iyang final game sa NBA batok Utah Jazz sa nahibiling 4.1 seconds ug namatay siya sa edad nga 41. Sulagma lang ba?

`LOVE LANG’

Ang good news kay bisita nato ang chikadorang DJ sa “Love Lang” Love Radio nga si Myka Hera sa Ssssuper Ka.

Unsay iyang chika? Basaha karong Huwebes sa Superbalita Laysho. Walay bad news. Love lang.