SA PAGSAULOG sa Global Handwashing Day, ang Metropolitan Cebu Water District (MCWD) ug project-partner Vitens Evides International (VEI) nagpasiugda og handwashing activity sa Tisa Elementary School sa Cebu City niadtong Oktubre 15 ning tuiga.

Kapin sa usa ka gatos ka mga magtutungha sa elementarya sa maong eskwelahan ang nakabenepisyo sa handwashing activity diin gitudloan sila sa saktong paghugas sa ilang mga kamot aron masiguro ang kalimpyohon sa kaugalingon, sanitasyon ug dili pag-usik-usik sa tubig.

Ang MCWD Public Information Division Manager nga si Edna Inocando ug VEI project manager Patrick Egan ang mitambong sa maong kasaulogan.

Karong tuiga, “Clean Hands for All” ang tema sa Global Handwashing Day nga nagpaduso nga walay bisag usa nga mahikawan sa paggamit sa handwashing facilities, ug maapil sa mga epektibo nga programa sa handwashing aron dili mahimong hinungdan nga marisgo ang kinabuhi sa tawo sa mga sakit.

Project partners ang MCWD ug VEI sa usa ka 5-year nga water supply project nga gitawag og WatSup Cebu nga naninguha nga mahatagan ang 80,000 ka mga tawo og luwas, limpyo ug barato nga tubig dinhi sa Metro Cebu.

Kini usab nga proyekto nakatabang sa MCWD nga makabutang og linya sa tubig sa lugar nga walay MCWD connection ug lakip na ang Barangay Tisa sa usa sa beneficiary-barangays dinhi sa Cebu City. (PR)