SA EDAD nga 39, wa na magtuo si Ermeela Piodos nga makabaton pa siya og anak sa miaging tuig.

Matod niya, aduna usab siyay polycystic ovarian syndrome (PCOS).

“2017 pa lang giingnan nako sa doctor nga dili nako mabuntis. Akong duha ka ovaries kay naay tumor,” asoy ni Ermeela.

Apan niadtong Hunyo sa milabay nga tuig iyang nahibaw-an nga siya nagsabak diay ug kini tulo na ka buwan.

Niadtong Disyembre 4, 2019, usa ka himsog nga batang lalake ang iyang gihimugso.

Siya nanganak pinaagi sa normal delivery sa Chong Hua Hospital sa dakbayan sa Mandaue.

Ang bata bunga sa pagminahalay nila sa iyang partner nga si Rogelio Getaruelas.

Asoy ni Ermeela nga dihang siya mabdos pa, kalima siya ma-slide ug nabunal ang iyang sampot.

Delikado usab ang iyang pagsabak kay taas ang iyang blood pressure.

Hilabihan ang iyang kalipay dihang iyang nakit-an ang bata nga kumpleto ang parte sa lawas ug way deperensiya ang iyang anak dihang kini nahimugso.

“Nigawas siya nga wala pa ka-position ang doctor. Wala pa masug-an ang delivery room,” saysay sa 40 anyos nga ginang nga nahimuot sa kasinatian sa pagpanganak.

Niabot og usa ka adlaw ug tunga ang pag-labor ni Ermeela.

Niadtong Agusto 1, 2020, gibunyagan ang bata sa Our Lady of Consolacion Parish-Recoletos sa Laray, Barangay San Roque, dakbayan sa Talisay.

Ang bata ginganlan nila og Erhl Rodney Piodos.

Si Padre Renie Villalino, OAR, ang nagbunyag sa bata.

Ang mga ninang mao sila si Queenie Weesen, Jovelyn V. Sotto, Sharon Joyce Noval, Collen Quijada, Cristy Paloga, ug Portia Discartin. Samtang ang mga ninong naglakip nila ni Juvenal Polo, Ariel Adanza, Takahashi Masanori, Jan Abellana, Jade Relampagos, Joseph Reponte, Anjill Sanchez, ug Marl Nicole Torres. (SCG)