SAYOD kong gusto mo akong angkunon

Kay dugay ka nang naibog

Sa akong katahom. Buot mo nang taakon

Ang tanaman ning akong kalibutan.

Palihog, ikaw akong hangyuon...

Ayaw ako iparehas sa ubang mga babaye

Sa laing mga tanaman nga way kahadlok

Iharag ang ilang bahanding inampingan,

Kay ako nag-amping nga dili magum-os

Ang putling mga gihay sa akong pagka bulak.

Bugtong ko kining igasa sa binuhat nga

Akong higugmaon hangtod sa kahangturan.

Kon gusto mo akong angkunon

Mahala ug amumahi ang akong hiyas,

Kay ang gugma mong malungtaron

Himuon kong bililhong mutya

Nga way pagkupas.

Ug unya kitang duha adto mopuyo

Sa matahom nga walog sa kinabuhi.

Himuon ta ang atong gugma nga usa

Ka lig-ong talikala nga kanunay

Magdugtong sa atong mga kasingkasing

Hangtod sa kamatayon!