Karon ng Domingo, Oktubre 25 na diay ang pagpili sa Ms. Universe Philippines 2020 diin ang representante sa Cebu Province mao si Apriel Smith nga napili nga Binibining Cebu mga duha ka tuig ang nilabay (kon wa ko masayop).

Si Michelle Gumabao nga nidaog kanhi sa usa sa mga korona sa Binibining Pilipinas, usa sa mga gibantayan karon kay giingon nga may purohan nga molusot lakip ang taga Bohol ug Aklan.

Atong huwaton kon kinsa gyud ang mosul-ob sa korona nga ginganlag Filipina nga nagkantidad kuno og P5 milyones.

Duna siyay mga diamante, perlas, sapphire, ruby ug topaz.

Si Gazini Ganados, ang Cebuana nga Bb. Pilipinas Universe 2019 giingong gitugtan ni Stella Marquez Araneta, ang bosing sa Bb. Pilipinas Charities nga mokorona sa bag-ong Ms. Universe Philippines 2020.

Kini ang gipahibalo ni Shamcey Supsup-Lee, bosing sa Ms. Universe Philippines, nga Ms. U 3rd runner-up usab kanhi.

Ang koronasyon makita sa GMA 7 sa 9:00 sa gabii ug i-replay sa alas 10:30 pm.

Bisan pa kuno nga nitambok si Angel Locsin karon, wa matandog ang desisyon ni Neil Arce nga pakaslan kini.

Dunay mga hungihong human mauswag ang kasal nga karong Disyembre na pero labing seguro sa sunod tuig na gyud kini.

Mga duha na lang ka buwan, kapin kon kulang, Pasko na, bisan pa sa paningkamot sa lainlaing mga sektor may kabalaka gihapon ko.

Daghang mga tradisyon ang di na mahimong buhaton karon tungod sa health protocols.

Manghinaot lang ko nga maningkamot kita nga malipay kay ang kinabuhi giingong mag-agad ra sa atong paningkamot.

Tungod sa balaud batok sa mendicancy, usa ko sa kuli kaayong mokuot og salaping Pilipinhon kon may magpakilimos labi na gyud kon baskog pa nako tan-awon ang nagkangkang sa iyang kamot.

Karong bag-o ni level-up ang mga makililimos kay manghatag nag sobre alang sa imong ihatag.

Pero niadtong nakahigayon kog layat sa Cebu City, wa ko magduhaduha paghatag ngadto sa bata nga nitokar sa iyang ukulele (with matching sayaw pa).

Nitokar siyag tulo o upat lakip na ang “Despacito” ug “Pasko sa Usa Ka Binilanggo.”

Wa nako isipa nga nagpakilimos siya kon dili nagpakita lang sa iyang abilidad bisan pa sa kalinghod sa iyang edad.

Sa sunod higayon, mas dako pa ang akong ihatag niya. Pramis!