Florencio Pacaldo Inoc

Intramuros, Cordova, Cebu

LIMA na ka tuig ang pagka biyuda ni Carlita. Namatay ang iyang bana nga si Marcelo sa usa ka aksidente sa dalan. Nagmaneho ang iyang bana sa iyang motorsiklo gikan sa iyang gitrabahoan, ug wala damha nga nadumbolan kini sa usa ka dumptruck dihang mi-oberteyk kini kaniya.

Dako kaayo ang gibating kaguol ni Carlita sa nahitabo kang Marcelo. Buotan ug responsable nga pagka tawo ang iyang bana. Matag day-off anaa kini sa balay ug mangunay sa mga buluhaton. Maghikay sa pagkaon ug manglaba sa mga bulingong mga sapot. Human sa mga buhatunon sa balay, iyang ihatag ang iyang panahon kang Carlita ug sa ilang anak.

Sa kamatayon ni Marcelo nawagtangan si Carlita ug usa ka bililhon kaayong bana. Mao nga nakasaad siya nga dili na gayud magminyo pag-usab. Alang kaniya wala nay laing lalake nga ikapuli kang Marcelo. Iya na lang igahin ang iyang panahon sa ilang bugtong anak nga lalake nga liwat kaayo sa iyang bana.

Sa pagpanglabay sa mga tuig nakadawat da si Carlita sa kamatayon sa iyang bana. Nabatyagan sab niya ang kahaw-ang sa iyang kinabuhi nga way katambayayong. Ngano man tuod nga hikawan man niya ang iyang kaugalingon nga magminyo pag-usab. May mga lalake nga mihalad sa ilang gugma kaniya, apan wa siyay nauyonan kanila. Trayentay siyete pa ang iyang panuigon ug nagpabilin pa ang iyang kaanyag.

Giingon man nga ang talikala sa kaminyuon mabugto diha sa kamatayon. Ginaingon pod nga ‘No man is an island.’ Tinuod, mahimo nga ang isla mag-inusara, apan dili ang tawo. Ang tawo nagkinahanglan og kauban nga maoy kasumbongan sa iyang mga pagbati. Nakahukom siya nga isalikway na niya ang iyang panaad kang Marcelo nga dili na siya magminyo pag-usab. Naglaom siya nga may tawo pa nga buotan nga moabot sa iyang kinabuhi.

USA ka adlaw niana miabot ang gipaabot nga bisita ni Carlita. Nag-teks kini daan ug nagpahibalo nga mamisita kaniya. Si Buddy, kanhi hinigugma ni Carlita sa batan-on pa sila. Nagkabulag sila sa dili bug-at nga rason. Una nga nagminyo si Buddy kay nakapamabdos sa babaye nga nahimo niyang asawa.

“Carlita, kumusta ka? Wala na si Marcelo. Wala na sab si Arnie, ang akong asawa. Namatay siya sa kanser. Atong dugtungon ang nabugto nga talikala sa atong gugma. Dili pa ulahi ang tanan. ‘No man is an island.’ Nagkinahanglan ka kanako ug nagkinahanglan sab ko nimo. Magpakasal ta sa labing dali nga panahon!” pintok nga namulong si Buddy nga naggunit sa mga kamot ni Carlita samtang sila nanglingkod sa sopa sa sala sa balay ni Carlita.

Gitutokan ni Carlita si Buddy. Ug hingpit nga nahanaw ang iyang panaad kang Marcelo nga dili na magminyo pag-usab.

“Oo, Buddy, magpakasal ta sa labing dali nga panahon!” ni Carlita nga tam-is kaayog pahiyom ngadtong Buddy. (Katapusan)