SA pagsugod sa relasyon sa magtiayong Almer “Aming” Mabalato ug Mary Jane “Jenjen” Olasiman-Mabalato, pipila sa ilang suod nga mga higala ang wa makauyon tungod sa physical ug gintang sa ilang mga edad.

“Siya kumpleto unya ako totally blind. Ingon sila mura kog nakadaug og sweepstakes. Pero wala nako panumbalinga ang gisulti sa uban kay kon dako ang imong pagtuo sa gugma, sigurado man gyud makadaug ka,” paambit ni Aming.

Siya dili makakita sukad sa iyang pagkatawo niadtong Hunyo 21, 1990. Siya ang ikatulo sa lima ka magsuon.

Samtang si Jenjen, maguwang og 17 ka tuig sa iyang 28 anyos nga bana.

Nagkasuod ang duha dihang gisaulog sa ginang ang iyang birthday niadtong Hulyo 18, 2016 sa ilang panimalay sa Barangay Cogon, siyudad sa Sugbo.

Ang duha kauban sa Sto. Padre Pio Choir diin si Aming ang trainer ug keyboardist samtang si Jenjen ang tigkanta.

Lab-as pa sa panumduman ni Aming dihang gisugot kini sa iyang asawa niadtong Agusto 29, 2016 sa alas 7:57 sa gabii.

Si Jenjen niangkon nga nabato ang iyang kasingkasing ug dugay nagminyo tungod sa mga kapakyasan ug kasakit nga iyang naagian sa nanglabayng mga relasyon.

“Mao diay nagbuwag mi ato nila kay siya (Aming) diay ang gipili sa Ginuo para nako. Siya ang gipitik sa akong kasingkasing,” sumala sa 45 anyos nga ginang.

Ang pagkaparaygon, pagka-caring, ug pagka maayo ni Aming sa pagtukar sa keyboard ug pagkanta bisan sa kakulian sa iyang panan-aw, ang nakabihag ni Jenjen.

Susamang kinaiya usab ang nagustohan ni Aming kang Jenjen.

Niadtong Hulyo 18, nahitabo ang gihulagway nga dakong selebrasyon sa Sto. Tomas de Villanueva Parish sa Barangay Poblacion, siyudad sa Sugbo diin pito ka mga pari ang nikonselebrar sa kasal nila ni Aming ug Jenjen.

Si Aming ang regular nga keyboardist sa mga misa sa maong simbahan sukad niadtong Enero 2015.

Ang duha nisaad atubangan sa Ginuo nga bisan unsay mga problema, magpabilin ang ilang gugma ug pagsalig sa usag-usa. SCG