DEAR Papa Joe,

Ako diay si Joselito, 24. Ang akong problema kay mahitungod sa trabaho. Ang ako man gud nga supervisor kay unfair kaayo kay mangita siya og bikil nako. Unya kon akong patulan dayon og sumbong sa among manager, pero ang akong mga kauban nga nahulaman niya og kwarta, wa siyay ek bisan di gani motrabaho pag-ayo kay hadlok man siya paninglon.

Mao na wa na ko makaagwanta, ako siyang giingnan nga “Sir, patas sad, Sir, kay di paman pareha among trabaho diri. Kalma man kaayo akong mga kauban sa trabaho nya di man nimo badlungon.” Mao to, iya kong giingnan nga gusto ba daw ko mataktak sa trabaho kay insubordination daw ko.

Usahay makaingon na lang ko nga lami kaayo ibalhin og trabaho, pero maglisod ko kay di baya ko gradwado sa college. Gidawat lang ko sa unang supervisor diri kay kita man siya nga kugihan ko. Karon, giingnan ko niya pwede ko mataktak kay di ko gradwado. Unsa may buhaton nako ani? Usahay makahunahuna ko nga birahan ko nalang ni siya sa gawas. Tambagi ko.

JOSELITO

Joselito,

Kon sa imong tan-aw nimo di na patas ang dinad-an sa imong supevisor, pwede man ka moreklamo sa higher officer ana. Kon gulaton ka nga taktakon sa bisor nimo, pwede sad ka moduol sa Department of Labor, labi na walay due process. Kanang pagka undergrad nimo, precedent na na sa unang management kay gidawat man ka.

Kon taktakon gyud ka, pwede sad kay sa National Labor Relations Commission (NLRC) labi na naa kay ebedensya sa di patas nga pamaagi. Ayaw lang sad ibutang sa imong kamot ang balaod. Ayaw padayuna nang plano nimo nga birahan siya. Samot ka magkaproblema ana. Salamat.

PAPA JOE

(sa inyong tampo ipadala sa papajoesuperb@gmail.com)