Dear Papa Joe,

Ako diay si Jenifer, taga Leyte ko apan gatrabaho ko sa una diri sa Cebu. 28 na diay akong edad.

Sa wa pa ko gatrabaho diri sa Cebu, OFW diay ko. Nag work ko sa Taiwan unya nahimamat nako akong ka livein ron. Pagsugod sa pandemya, gipapauli na mi sa among amo pero wa ko mouli sa amoa sa Mindanao kay nagpuyo mi sa akong uyab. Akong giingnan akong ginikanan ana ug wa gyud sila makauyon kay wa nay mosuporta nila. Apan giingnan ko sa akong uyab nga di sa tanang panahon sila na lang kay naa kuno koy kaugalingon kalipay.

Mao to nisupak gyud ko apan nagsuporta gihapon ko nila. Apan karon na close man among trabahuan, so nag-stand by ko ron og pila ka buwan. Akong problema mouli na lang ko sa Mindanao apan akong problema kon dawaton ba kaha ko o di ba lain mouli ko. Palihug tambagi ko.

JENIFER

Jenifer,

Wa koy nakita nga problema if mouli ka apan di malikayan naa gyuy paghisgot nga mahimong makalain nimo apan mawa gyud na siya. Sama sa istorya sa prodigal son. Apan ang pangutana, makauli na ba sad ka?

Kon pwede, pag-estorya mo og tarong sa imong ka live in kay basin magmahay mo. Sayang sad og maguba inyong relasyon. Gawas na lang kon may pagmahay sad ka mao gusto ka mouli.

Apan ang punto, pwede o okay ra mouli ka? Ang tubag ana kay naa ra gyud nimo. Ayaw lang pag-decide basta naglibog pa ang imong ulo kay mahayan unya nimo. Basin epekto na sa quarantine. Daghang salamat.

PAPA JOE

(para sa inyong tampo ipadala lang sa papajoesuperb@gmail.com)