Dear Papa Joe,

Itago lang ko sa pangan nga Happy. Please tambagi ko sa akong problema. Naa koy anak sa akong uyab sa una, ex na nako siya kay wala man siya mangamahan sa akong anak. Wala gyud siyay paki. Kon ako siyang pangayuan og kwarta para suporta, sige lang og saad, dili gyud mohatag.

Unya duna koy nauyab nga bag-o ug siya ang nangamahan sa akong anak. Siya ang nisuporta ug iya pod apelyedo ang gidala sa akong anak. Pero karon nakita sa bata ang pamilya sa akong ex-bf which is ang tinuod nga amahan sa akong anak, unya gusto nilang kuhaon ang bata. Pero dili nako ihatag. Nahadlok kog ila pugson og kuha kay duna raba silay kaya.

Makuha ba nila ang bata nga apelyedo man sa akong kapuyo ron ang gidala? Sakto ba akong gibuhat nga apelyedo sa akong ka live-in akong gipadala sa akong anak? Tabangi ko palihug.

HAPPY

Dear Happy,

Una sa tanan, wala nimo gi klaro kon ang apelyedo sa imong ka live-in maoy nakasuwat sa birth certificate. Kon mao na ang nahitabo, siguro pag-anak nimo, imong gi declare sa hospital mao ang imong ka live-in ug nipirma gyud siya sa likod sa birth certificate, duly notarized by a lawyer. Ug ingon ana man gani, pwes, may dunay katungod ang imong ka live-in ug ikaw mismo ngadto sa bata.

Since wala man pod mo makasal sa amahan gyud nianang bataa, so technically wala gyud siyay katungod sa bata ug dili sab niya na makuha especially nga ikaw ang inahan ug ikaw dunay mas labaw nga dunay katungod kay gamay paman ni.

Sa pangutana nimo ug sakto ba imong gibuhat nga gipaangkon nimo sa imong ka live-in ang bata, well, ikaw ra gyud bugtong makatubag ana. Ug paminaw nimo mahal niya ang bata ug responsable pod siya, siguro sakto ang imong gibuhat.

PAPA JOE

(Sa inyong suwat tampo, ipadala sa papajoesuperb@gmail.com)