Dear Papa Joe,

Hinaut nga matambagan ko nimo ani, Sir. Ako diay si Ana, 40 anyos na ang edad nga taga Cebu ra.

Naa koy igsuon, 36 anyos. Nangutang ni siya og motor para lagi kuno ihabalhabal. Unya ako ang iyang gihimong co-maker. Maayo man ang dagan sa pagbayad sa usa ka tuig, kugihan man siya pero sa kalit lang gipa-assume niya ang motor sa tawo nga wa ko kaila ug karon ang iyang gipa assume wala nay bayadbayad ug sige na og paningil ang kompaniya sa motor kay imbarguhon.

Karon nisibat ang akong manghud ug niadto sa Bohol. Karon ako na ang girumbo sa kompaniya kay ako daw ang co-maker. Ana diay na, ako diay ang paninglan? Unsaon man ko ni?

ANA

Ana,

Para maklaro ug di ka mahibong, balika ngadto sa kompaniya diin giutang ninyo ang motor. Baliki pagbasa ang mga gipirmahan ninyo ug nimo nga kontrata nganong ikaw ang gipaningil.

Now pangitaa gyud to ninyo ang nag assume kay basin gamiton na hinuon to ang motor sa dautang paagi. Kamo pa ang manubag. Kon madumduman ninyo, ipa barangay ninyo kauban ang imong manghud para magkinaunsa, ipaimbargo na lang na ninyo ang motor. Kon di gyud makabayad ug unsa pay nakalatid sa kontrata, tubagon na na sa imong igsuon.

PAPA JOE