DEAR Papa Joe,

Tagua lang ko sa name nga Joana. Duna koy patambagan nimo nga problema, Papa Joe, bahin sa akong kaipon.

Dugay na kog inantos ani iyahang batasan kay ako naa na koy anak sa akong first kaipon sa una pero wala mi magkasinabot kay bisyuso man gud to. Ang gi problema nako, Papa Joe, sa akong kaipon karon kay dili man ganahan sa akong anak. Permi niyang singkahan ug kasab-an nga way hinungdan. Syempre inahan ko, kinsa may malipay nga ang imong anak ingun anaon maong permi ming mag-away sa akong kaipon.

Kon suguon gani niya papaliton niyag sigarilyo, abtik kaayo akong anak padulong sa tindahan kay tungod nahadlok niya. Murag ma-trauma akong anak sa iyaha kay iyaha na ganing tingog mabatian sa akong anak, maorag malisang intawon.

Unsa may angay nakong buhaton, Papa Joe? Naa baya mi baby karon sa akong kaipon. Maong nisamot naglibog na ko unsay angay nakong buhaton. Palihug tabangi ug tambagi ko. Daghang salamat.

Joana

Joana,

Nganong gaantos ka pa man anang lakiha nga wa man diay nay ayo? Ako pa nimo ikiha na nimo og child abuse.

Dapat unta iyang dawaton sama sa pagdawat niya nimo kay wa bayay labot ang bata ana. Unta, Day, nasayop na ka sa una. Gilantaw unta nimo ang sunod nga di sad bati kay tan-awa, magduha na ang inyong anak unya palpak gihapon.

Ako pa nimo patagma imong bana karon kay kon di, magmahay ka og samot. Mas maayo man nga ipabarangay para maobligar siya. Pero kon di na gyud madala, biya oi. Grasyahan ra ka sa Ginuo puhon ug sunod klaruha gyud ang lalake, ayaw patakag sulod sa relasyon.

Papa Joe

(sa inyong tampo ipadala sa papajoesuperb@gmail.com)