DEAR Papa Joe,

Tagua lang ko sa ngalan nga Miss No Doubt, 24 years old, may ka live in ug duna na mi mga mga anak. Kining akong ka live in barkada kaayo mi ani niya sukad pa sa high school hangtud nga nagkauyab mi pag ka college ug hantud na nag live in mi.

Idol kaayo nako ni siya kay membro ni siya og usa ka banda. Para nako cool kaayo siya ug abi nako siya ang akong forever. Wala man koy ikasaway niya kay buotan man siya ug dili chicksboy bisan naa siyay mga fans. Pero niabot gyud ang time nga sa kalit lang nipatigbabaw ang reyalidad. Wala ni siyay tarong trabaho ug mao ni among awayan kay mas giuna niya ang banda-banda mao nga mataktak nalang siya sa work kay mo absent man permi kon naay gig.

Hangtud nga nakadesider ko nga magbuwag ra mi ug okay ra sad niya mosuport lang daw siya sa mga bata kutob sa iyang mahimo Kay unsaon man daw mao ma ni iyang linya. Sakto ba ko sa akong desisyon? Palihug tambagi ko.

MS. NO DOUBT

Miss No doubt,

Para nako walay sakto ug sayop nga desisyon kon di nimo ni pagamahayan. Bunga sa linghod nga hunahuna ug sa karon lang nahinug na ka sa pangisip mao nga nakakab-ot ka sa desisyon nga ing-ana.

Siguro ayaw lang sa sirad-i imong pagbati niya. Basin og mahinug siya sa iyang panglantaw sa kinabuhi, timan-i may mga anak mo. Desisyon para sa tanan, di para sa imo lang. Di man sad nato masulti nga way kwarta sa banda kay naa say banda na mo sikat ug maka tigum. Basin pa diay mahitabo ni nila. Lastly, pag-ampo sa Ginuo ug itugyan niya ang tanan. Daghang salamat.

Papa Joe

(Sa inyong tampo ipadala lang sa papajoesuperb@gmail.com)