(Ikaupat sa pito ka mga gula)

Sa paminaw ko sa akong kaugalingon, naglutaw ko sa panganod ug unya kalit lang sab nga nagtindog ko sa paraiso nga sa tibuok kong palibot diha ang mga buwak nga nangalimyon sa talagsaong kahumot. Grabe ang tinagubtob sa akong dughan. Kahinam ug kalipay ang akong gibati.

“Efren?”

“Yes, Loida. Ako ni.”

Morag gusto kong gakson si Efren ug ipabatyag ang gibati kong kamingaw ug pagmahal kaniya. Apan nagpugong ko sa akong kaugalingon. Wa ko ipakita kang Efren kon unsa ang gibati ko niadtong tungora, di ko gusto nga mamatikdan niya nga secret love ko siya.

“Ikaw rang usa?”

Milingi-lingi ko. Gipangita ko si Susette apan wa ko siya makita.

“Oo, Loida. Tua si Susette sa ilang ba’ay. Tua man gud ang among mga barkada. Sa miaging pista dinhi, ako ra ang mikuyog kang Susette dinhi. Pero karon, tibuok barkada na ang mianhi.”

Miyangu-yango ko.

“Nananghid ka ba niya nga moanhi ka sa plasa kay motan-aw sa street dancing sa Panagsogod Festival?”

Nanglingu-lingo si Efren.

“Na, seguradong gipangita ka na ni Susette ron, Efren.”

Sa hilom gibati ko na sab ang kalipay kay magkaestorya mig dugay si Efren. Igo lang mipakibo sa mga abaga si Efren. May nahunahunaan ko.

“Nakapaniudto ka na ba, Efren?”

Mitando si Efren.

“Pero gamay ra ang akong nakaon kay busog man ko.”

Nakapahiyom ko.

“Kon mao adto ta sa amo. Tua sab mi hikay. Mokaon kag kalderetas nga kanding, Efren?”

“Wow! Paborito kaayo na nako, Loida. Kalit lang kong gigutom sa paghisgot mo anang sud-ana, da.”

Kilig to the bones ang akong gibati kay seguradong mokuyog si Efren nako ngadto sa amo.

“Kon mao, tana, adto ta sa amo. Wa pa sab ko makapaniudto. Seguradong luto na ron ang kalderetas nga kanding.”

Dasig kaayo si Efren samtang nanglakaw na mi. Walking distance lang ang among balay gikan sa plasa. Diyotay pa ang mga bisita sa among balay pag-bot namo ni Efren. Diha sila si Mama ug Papa sa sala. Gipaila-ila ko si Efren sa akong mga ginikanan. Unya gidala ko si Efren sa terrace.

Gisugo ko ang among katabang nga dad-an mig mga pagkaon, salad ug drinks si Efren labi na gyud ang kalderetas nga kanding.