SA BISAN unsa nga butang, kon magsugod, mas maayong maghinayhinay. Ang tempo mag-anam og kakusog samtang magkadugay. Kinahanglan inanay.

Bisan sa biseklita, kinahanglan nga inanay sab ang pagtindak, di diretso-diretso lang kay ang muscles di maayong pakalitan. Usa ni sa akong sayop kaniadto tungod kay sikadsikad ra ko diretso nga way preparasyon.

Ang Carcar City labing minos 50 kilometros gikan sa amoa. Busa, kon pabalik, naa ni sa labing minos 100 ka kilometro. Apan excited lagi kaayo, akoa sab ning gitindak kauban ang among kanhi photographer nga si Allan Defensor. Wa ko makalimot, Huwebes Santo kadto.

Ang labing layo nakong natindak niadtong panahuna mao ang Compostela. Kon roundtrip, naa lang tingali ni sa mga 60 kilometro ang gilay-on. Di pa kanunay.

Unsay nahitabo nako? Gawas nga laspag kaayo ko sa pag-abot sa balay, hait pa kaayog tinan-awan ang akong asawa kay naandan namong manimba sa hapon, laspag na kaayo ko. Maora kog gibunalbunalan pagkahuman.

Wa ko makatulog nianang gabii kay ang akong kalawasan haskang sakita. Mga lima na tingali ko ka buwan nga nagsikadsikad apan wa pa ko kabiyahe og ingon niadto ka layo. Angay unta hinayhinay.

Nganong mas maayo

Ang cycling mas maayo kay sa running labina kon ikaw edaran na. Namatud-an ni sa pipila ka mga pagtuon. Mao usab ni ang sulti sa pipila ka mga orthopedic surgeon nga akong gipangutana. Parte sa ilang rehab sa mga pasyente, usa sa exercises nga ilang irekomendar mao ang cycling.

Ilang pasabot nga low to medium impact ang biseklita kon muscles na ang hisgutan. Di kaayo grabe ang impact ani ngadto sa joints ug muscles kay magtindak ra man ka. Mahimo ra nimong pahumukan ang pagtindak base sa unsay imong makaya ug komportable ka.

Sa running man gud, labina kon overweight ka, ang imong tibuok timbang maoy suportahan sa imong kabukogan. Imagine sa impact niini ngadto sa lower parts sa imong body.

Candle lighting

Karong adlawa, Disyembre 8, 2019, ang among grupo sa Hugs magpasiugda na sab sa tinuig nga kalihukan nga mao ang World Wide Candle Lighting nga pahinungod sa mga anak nga nangamatay sa nagkadaiyang mga sirkumstansya. Anha kini ipahigayon sa Senior Citizens Park sa likod sa Cebu City Hall.

Sugdan ang kalihukan sa alas 5 sa hapon hangtod sa alas 8 sa gabii. Pagdala og kandila nga gisulod og baso ingon man framed nga picture sa imong anak nga namatay. Mas maayo usab nga magsul-ob og puro puti. Libre kining mao nga kalihukan. Kita-kits sa mao nga oras ug dapit.