DIRIYOT unta nga way promenade kun prom 2020 nga ipahigayon sa University of Cebu Lapu-Lapu – Mandaue (UCLM) campus nga maoy gikahinaman sa mga tinun-an sa high school.

Kini tungod sa hulga sa coronavirus disease 2019 (Covid-19). Ang Department of Education nakahukom sa pagkanselar sa mga kalihokan sa matag tunghaan niadtong unang semana sa Pebrero.

Orihinal nga gitakda ang kalihokan niadtong Pebrero 14, apan gipugngan sa kadagkuan sa tunghaan gumikan sa maong sitwasyon.

Niadtong Pebrero 27, nahukman nga idayon ang prom sa dihang gilugakan sa DepEd ang nauna nilang memorandum.

Gipatuman sa mga magtutudlo ang pagkontrolar sa outsiders nga moapil sa tapok sa dihang gidid-an ang mga chaperone, ginikanan o ubang sakop sa banay nga makasud sa venue aron nga dili mosamot ang daghang tawo sa area.

Makita ang kamaya sa panagway sa matag tinun-an nga nag-enjoy sa prom nga mahitabo lang kausa sa ilang high school life, bisan gilimitahan ang oras sa kalihokan ug sa gipatuman nga protocols.

TEMA

Karong tuiga, winter wonderland ang event’s theme nga gipahigayon sa Waterfront Hotel, Artic Hall, Lahug, Cebu City.

Elegante tan-awon ang mga estudyante sa dihang ang mga lalake nagsul-ob og tuxedo ug suits samtang long ug ball gowns sa mga babaye.

Ang high school principal nga si Madam Gloria Deniega nihatag sa iyang inspirational message ngadto sa gatusan ka mga tinun-an sa Grade 9 ug Grade 10, diin ang tunghaan naningkamot nga mamahimo kining memorable experience sa mga estudyante taliwala sa mga pagsuway.

PROGRAMA

Ang tradisyonal nga pag-turn over sa ‘Key of Responsibility,’ ‘Book of Knowledge,’ ug ‘Heart of Humanity’ ang gitunol gikan sa representante sa Grade 10 ngadto sa Grade 9.

Magsilbi kining kabilin ngadto sa sunod nga batch sa higayon nga mograduwar na sa Junior High ang Grade 10 students.

Gisundan sa cotillion dance, usa ka matang sa social dance diin magpares ang lalake ug babaye diin sagad isayaw ang waltz. / FVQ