Mokunop na ang gahom ni Presidente Rodrigo Duterte sa 2022 nga eleksyon. Tatawng hinungdan nga mihana nagpahit si kanhi House Speaker Pantaleon Alvarez, beteranong magbabalaod sa Mindanao nga secretary-general sa PDP Laban diin si Duterte maoy nangulo. Polos sila abogado ug suod nga manag-amigo.

Natandog sa dihang gikudeta si Alvarez isip house speaker human gikabikil sila Davao Mayor Sara Duterte-Carpio, Rep. Gloria Arroyo, Ilocos Gov. Imee Marcos, Rep. Tony Boy Floirendo, PNP Chief Gen. Ronald dela Rosa, BOC Chief Nicanor Faeldon, Senate Pres. Koko Pimentel ug PLLO Sec. Adelino Sitoy. Dugangan pa nga gilaslasan ni Alvarez ang district allocations sa mga sakop sa oposisyon. Hulip ni Alvarez ang laing alalay sa politika ni Duterte nga si Rep. Arroyo.

Birada ni Alvarez nga pakyas ang administrasyon pagtubag sa pandemya. Sunod nga presidente dili lang paisog-isog kondili kanang makamao mohandol sa krisis, utokan ug dunay katakos nga mangulo sa nasod.

Naghisgot sa problema sa ekonomiya pagkawalay trabaho, nanira ang mga negosyo, OFW mamauli nga walay trabaho, maritime dispute sa China diin 200 ka American battleships sa Pasipiko nga kita mapiksan sa panagsungi kay mao may duol sa China.

Leksyon ni House Speaker Alan Peter Cayetano ang nahitabo ni Alvarez nga gikudeta. Nahulog nga walay word of honor nga misuway pagsalindot sa term-sharing o gentlemen’s agreement nga sa sayo pa gisugyot ni Duterte.

Gisuspenso ang sesyon ug gipalakaw ang manifesto nga siya ibilin sa taas nga posisyon sa katarongan nga dili maayong mobiya atol sa pandemya ug nagtuki sab sa P4.5T national budget.

Ang kalangay god sa pagpasar sa budget sa kamara makabara sa pagtuki sa senado nga mohatod sa posibilidad nga mogamit sa 2020 re-enacted budget.