SERYUSO kadtong alegasyon ni Presidential Spokesperson Harry Roque nga ipaubos sa imbestigasyon si Land Transportation Office (LTO) 7 Director Victor Caindec gumikan sa kurapsyon. Nahigot sa anomaliya nga maoy nakapalangay sa rehistrasyon, plaka ug stickers sa mga motorsiklo. Hulyo 2020 gikataho ang kalangay sa pagproseso sa certificates of registration sa mga bag-ong sakyanan lakip na sa motorsiklo. Pasangil nga si Caindec nangilkil sa motorcycle distributors. Samtang patungan ang matag sakyanan sa ubang car dealers.

Sa sayo pa giabisuhan ug gihatagan og higayon si Caindec sa pag-usab sa giingong kapalpakan. Dihay higayon nga siya gitawagan ni LTO Chief Edgar Galvante. Ang seryusong pasangil ni Roque batok Caindec gisuportahan og mga dokumento. Si Roque mialsa sa maong isyu ngadto ni Galvante human mga tag-iyag motorsiklo dili magparehistro sa LTO sa dakbayan sa Sugbo kay lisudlisoron, dili gilayon mosanong ingon og dunay gipaboran. Adto na magparehistro sa probinsya. Unsa pod ang nakaon sa amahan ni Caindec nga miingong nadato ang iyang anak sukad matudlo nga regional director.

Si Caindec sa iyang pagtambong sa Kapihan sa Sugbo nangatarongan nga iya ganing giyam-iran ang suborno nga idul-it sa local dealers nga namaligyag motorsiklo nga walay rehistrasyon sa LTO aron lang iyang ihunong ang pagpa-inbestigar. Misumbalik nga si Roque maoy associate sa mga abogado sa mga car dealers nga kwestyonabli ang binuhatan. Gitin-aw sab ni Caindec nga maoy mabasol ang mga motorcycle dealers nga dugayng moduso sa mga papeles ngadto sa LTO. Ilang tingbon ang halin sulod sa pipila ka bulan una pa ihatod sa LTO nga nakatampo sa kalangay sa rehistrasyon, plaka ug stickers.

Nahilom ang maong bikil tali ni Roque ug Caindec. Apan nahaling nga nalakbitan atol sa imbestigasyon sa Senado kabahin sa Motorcycle Crime Prevention Act. Mihimakak ang lima ka motorcycle dealers Du Ek Sam, DES Marketing, DES Strong Motors, Desmark Corp. ug Premio Corp. nga sila maoy hinungdan sa kalangay. Mitumbok kang Caindec nga mangayog P500 matag motorsiklo nga mahalin.

Nagmagahi sila sa paghatag hinungdan sa pag-aslom sa ilang relasyon. Dili gilayon morehistro sa mahalin nga sakyanan. Sigihan sila og harass human wa sila mosanongda. Wala kanilang motorcycle distributors ang paglangay kay gusto nilang madali tungod sa kompetisyon.