SA dihang midasmag ang pandemya si Department of Hedalth (DOH) Sec. Francisco Duque mitago sa tinuod nga inpormasyon. Napakyas pagsuhid sa mga nahakuyog sa biyahe sa tulo ka mga Insek nga konpirmadong positibo sa nasod, usa ang patay.

Huyang ang liderato, nahisalaag sa mga palisiya, kalangay sa pagtubag sa krisis, walay tino nga sistema sa travel restrictions, contact tracing ug mass testing. Mayoriya sa mga senador nanawagan nga moluwat sa katungdanan.

Palpak kadtong sintonado nga interpretasyon ni Duque nga milapdos ang second wave apan nasupalpal sa Malacañang. Nangayog pasaylo sa patakag bukas sa iyang baba nga mibahar o na-flatten na ang curve sanglit niadtong higayona nagsaka pa gihapon ang kaso.

Wala mosanong sa sugyot ni Dr. Rafael del Castillo nga dili ihulat og duha ka test ang positibo nga wala nay gipamati aron dili magsugwak ang mga ospital.

Ombudsman Samuel Martinez miinbestigar ni Duque sa iregularidad nga paggamit sa pundo sa pagpalit sa mga ekipos ug medical supplies. Gani lima ka mga opisyal sa DOH gisuspenso sa Ombudsman og unom ka bulan sila Asec. Kenneth Ronquillo, Asec. Maylene Beltran, Usec. Roger Tong-an, Dir. Laureano Cruz ug Dir. Esperanza Carating. Maoy gipasikaran ang kalangay sa pagpagawas sa mga benepisyo sa health workers, equipments sa medical workers ug ang lapso nga maoy naingnan sa kamatayon sa medical frontliners.

Si Dr. Tony Leachon nga miluwat sa pwesto isip special adviser sa National Task Force misaway ni Duque nga haguka ang estratehiya sa pagdumala. Walay gibug-aton kadtong rekomendasyon ngadto sa Inter-Agency Task Force (IATF) bahin sa quarantine status.

Dihay mitiyabaw ang mga sakop sa medical society kay giubos sa General Community Quarantine ang Metro Manila nga nagkadaghan ang mga pasyente nga ilang giatiman. Mikisi-kisi nga ang tonada gikabay-an sa emosyon nga naghulagway og rebolusyon. Misinta si Pres. Rodrigo Duterte sa maong pagpanghulga. Gitigom ang mga sakop sa IATF nahukman nga ibalik kadtong Modified Enhanced Community Quarantine. Nanawat og liboan ka mga health workers nga mohulip kon ugaling magrebolusyon ang mga medical practitioners. (csa_1156@yahoo.com / 09064648954)