SUGOD niadtong Dominggo, di na pasudlan ang Metro Manila sa mga tawo gikan sa gawas niini. Gitawag nila kini nga community quarantine. Ilang gilikayan ang pulong nga lockdown nga gigamit didto sa Wuhan, China sa pagsugod sa pagkuyanap sa corona virus.

Ang nahitabo mao nga kanselado ang tanang mga flight sa eroplano ingon man ang mga biyahe sa barko gikan ug paingon sa Manila. Community quarantine man o lockdown mao rang estoryaha.

Sanglit didto man sa Manila ang daghang mga kaso sa Covid-19, dako og matabang ang community quarantine aron di kini mokatap sa laing mga lugar sa Pilipinas.

***

Lahi ang Pilipinas kon itandi sa ubang mga nasod kay kita gibuwag man sa libo ka libong mga isla. Kapin sa 7000 ka isla, depende kon taub o hunas.

Apan tungod sa eroplano, ang kagaw gikan sa Manila usa ra ka oras ang biyahe aron manakod dinhi sa Sugbo. Mao nga kanselado na karon ang nga biyahe sa eroplano tali sa Sugbo ug Manila.

Si Cebu Gov. Gwen Garcia mimando na sa community quarantine sa Sugbo. Susamang mando giluwatan ni Cebu City Mayor Edgardo Labella. Nag-una pa gani ang mando sa gobernador sa Bohol nga sirad-an ang ilang border sugod karong adlawa.

***

Makaingon kita nga ang border control o community quarantine nga unang gisugyot sa kolumnista nga si Bobby Nalzaro, epektibo sa atong nasod kay gibuwag man kita sa mga isla.

Kay way kapuslanan ang community quarantine kon dia na sa Sugbo ang coronavirus. Unsa pa may alihan kon nakasulod na. Ang mahinungdanon nga duna kitay mga abtik nga lider sama nila ni Governor Garcia ug Mayor Labella.

Mag-unsa na lang kita kon ang atong lider mas isog pa sa coronavirus. Ingon pa sa akong silingan haplas na lang og alcohol bisan kon 99.9 porsyento ra sa kagaw ang mapatay.