KON ang usa ka sakyanan makabangga sa laing sakyanan unya ang drayber mosirit ug mosibat, usa kini ka kaso sa hit and run. Ang sagad nga katarungan sa drayber, ilabi na kon tawo ang nadasmagan, mao nga nisibat siya kay nahadlok nga dagmalan sa mga kaliwat ug higala sa biktima.

Ang Section 55, Republic Act 4136 (Land Transportation and Traffic Code), nagkanayon, “No driver of a motor vehicle concerned in a vehicular accident shall leave the scene of the accident without aiding the victim, except under any of the following circumstances:

“1. If he is in imminent danger of being seriously harmed by any person or persons by reason of the accident; 2. If he reports the accident to the nearest officer of the law; or 3. If he has to summon a physician or nurse to aid the victim.”

Di pabiyaon ang drayber sa sakyanan nga nalambigit sa aksidente gikan sa nahitaboan sa aksidente. Gawas lang kon mahimutang sa peligro nga dagmalan siya ni bisan kinsa gumikan sa maong aksidente, kon motaho siya sa maong aksidente ngadto sa kapulisan o kon motawag siyag doktor o nurse nga moatiman sa biktima.

Duna bay hit and run sa kadagatan? Sama sa pagkalunod sa fishing boat (F/B) Gem-Vir 1 didto sa Recto Bank sa South China Sea nga gitawag sa Pilipinas nga West Philippine Sea niadtong gabii sa Hunyo 9, Dominggo, atol sa Philippines-China Friendship Day. Matod pa sa mga taho nagpundo ang maong fishing boat sa dihang gibanggaan kini sa usa ka Chinese fishing boat.

Nalunod kini ug gibiyaan lang sa fishing boat nga nakabangga ang 22 ka mga Pilipinong mangingisda nga nagpa-utaw-utaw sa dagat hangtod nga nabangalan ug naluwas sila sa mga tripulante sa usa ka fishing boat gikan sa Vietnam. Di ba morag hit and run?

Didto kini mahitabo sa dapit nga giilogan sa daghang mga nasod, lakip na sa Pilipinas ug China, busa ang international law maoy sundon. Ang Article II, Section 2, 1987 Constitution, nag-ingon, “The Philippines renounces war as an instrument of national policy, adopts the generally accepted principles of international law as part of the law of the land and adheres to the policy of peace, equality, justice, freedom, cooperation, and amity with all nations.”

Samtang ang Article 98 United Nations Convention on the Law of the Sea, nag-ingon, “1. Every State shall require the master of a ship flying its flag, in so far as he can do so without serious danger to the ship, the crew or the passengers:

“(a) to render assistance to any person found at sea in danger of being lost; (b) to proceed with all possible speed to the rescue of persons in distress, if informed of their need of assistance, in so far as such action may reasonably be expected of him; (c) after a collision, to render assistance to the other ship, its crew and its passengers and, where possible, to inform the other ship of the name of his own ship, its port of registry and the nearest port at which it will call.” (edbarrita@gmail.com)