USA ka tawo nga naglakaw sa dalan sa sayong buntag nakasugat sa usa ka magsasangyaw nga nagkwentas sa dakong karatola nga nag-ingon, “The End of the World is Near.” Busa iyang gipanguta kon kanus-a man gyud. Ang tubag, “Karong udto.”

Kadtong tawo nga nangutana wa motuo sa gisulti sa magsasangyaw. Apan alas onse pa lang sa buntag naniudto na siya. “Matinuod pa lang, panagana lang,” matod pa niya. Wa pa gani to siya motuo.

Unsa kaha kon sama pa sa kadaghanan sa katawhan nga daling patuohon? Maong di na kita mahibu’ng kon daghan kanato ang motuo sa mga “double-your-money schemes,” sa “pyramid scam” ug uban pa.

•••

Nahimong viral sa social media ang usa ka fake news bahin sa usa ka kidnapping attempt didto sa syudad sa Danao nga nikatap sa Facebook. Sa post ni Brigs Granada Alvaro, usa ka 21-anyos nga tinun-an sa Danao, hapit siya makidnap.

Sumala sa post ni Alvaro, usa ka puti nga van nga dunay luwan nga babaye ug lalake nga kadudahan giparking sa Barangay Poblacion, Danao City. Samtang naghuwat siyag kasakyan nga trisikad sa mga alas siete sa gabii, ang babaye nisuway pagbaligya kaniya og perfume nga tag P100 o pagsimhot niini kon makauyon ba siya.

Apan iyang nadunggan ang siyagit sa usa ka bata nga nangayog tabang sud sa van. Maong wa madayon ang kidnapping. Sa dihang gisusi kini sa kapulisan sa Danao, nasuta nga hinimo-himo lang ni Alvaro ang maong estorya.

•••

Naukay ang mga tawo ug naalarma sa post ni Alvaro labi na nga daghang mga huhungihong bahin sa mga bata nga kidnapon ug kuhaan sa mga internal organs nga ibaligya og mahal ngadto sa nanginahanglan og organ transplant.

Gisikop si Alvaro ug giangkon nga tinumo-tumo lang niya ang maong post. Tungod niini, hayan nga mag-atubang si Alvaro og kaso nga alarm and scandal ug kalapasan sa balaod batok sa cybercrime.

Ang leksyon niini mao nga di ta magpataka og post sa social media kay hayan makalapas kini sa kodigo penal ug sa mga balaod batok sa cybercrime. Ang labing mahinungdanon nga leksyon mao nga di dayon kita motuo ug maalarma sa gi-post sa social media.