Nagkalapad ang mga kaso sa pagdagmal nga gisilotan sa balaod nga nagproteksiyon sa kababayen-an ug sa ilang mga anak. Karon, Ang Korte Suprema miingon nga ang pagdagmal sud sa usa ka lesbian relationship, relasyon sa babaye ug babaye, nahilakip sa Republic Act 9262, ang Anti-Violence Against Women and their Children (VAWC) Act of 2004.

Mao kini ang unod sa usa ka 10 ka pahina nga resolusyon sa Third Division sa Korte Suprema nga penetsahan og Disyembre 7, 2022 apan bag-o pa lang gipagawas. Usa ka tomboy gipasakaan sa kasong kalapasan sa Anti-VAWC Act sa iyang partner nga babaye sa Regional Trial Court (RTC) sa Antipolo City niadtong 2018.

Sumala sa record sa hukmanan, ang partner sa tomboy nahospital sa pipila ka higayon human sa ilang panagbuwag. Apan padayon silang dunay kontak sa usag’usa tungod sa giingong utang nga tres milyunes sa sinumbong sa iyang partner nga babaye ug panagbangi bahin sa ilang balay.

Ang partner giingong giabusohan pinaagi sa pagyawyaw, gipainom og medisina nga pangpakatug aron makuhaan og hulagway nga hubo ug gipapiit ang kamot sa pultahan sa sakyanan.

Ang akusado mipasaka og motion to quash sa maong kaso apan gi-dimiss kini sa RTC. Misaka ang akusado ngadto sa Korte Suprema. Matod sa akusado sayop ang RTC kay way labot sa RA 9262 ang lesbian relationships.

Gihisgotan sa Korte Suprema ang ilang desisyon sa kaso nga Garcia vs. Drilon (2013) nga nag-ingon “VAWC may likewise be committed ‘against a woman with whom the person has or had a sexual or dating relationship.”

“Clearly, the use of the gender-neutral word ‘person’ who has or had a sexual or dating relationship with the woman encompasses even lesbian relationships,” nagkanayon ang desisyon sa Korte Suprema sa 2013.

Giklaro sa Korte Suprema nga ang Republic Act 9262 nanalipod di lang sa mga babaye, apan lakip na sa mga babaye nga nalambigit sa usa ka lesbian relationship.

Sa atong nahaunang gihisgotan dinhi, usa ka bana gikonbikto sa kalapasan sa Anti-VAWC Act tungod kay nakapamabdos ug nakapaanak sa laing babaye samtang ang iyang asawa nagtrabaho didto sa gawas sa nasod.

Lahi kini sa estorya bahin sa usa ka bana nga miuli human sa tulo ka tuig nga pagtrabaho sa gawas sa nasod. Malipayon ang asawa nga misugilon ngadto kaniya. Matod sa asawa, “Dong, ang atong sari-sari store, convenience store na. Ang atong usa ka andana nga balay, tulo ka adana na. Ang atong duha ka anak, tulo na.” (edbarrita@gmail.com)