KINING mga tawong nagsalimuang di na gyud makatultol kon unsay ilang buhaton. Sama sa mga opisyales sa Bureau of Corrections (BuCor). Ang ilang unang sayop mao ang pagpagawas sa 1,914 ka mga konbiktado sa heinous crimes.

Ang ilang gigamit nga balaod, ang Good Conduct Time Allowance Act, wa magtugot niini, kay di man makapahimus kadtong konbiktado sa mga linuog nga krimen sama sa rape ug murder.

Apan nabisto kining tanan sa dihang nigawas ang balita nga hasta si kanhi mayor Antonio Sanchez sa Calauan, Laguna, nga gipahamtangan sa siyam ka silot nga reclusion perpetua, apil sa pagawson tungod sa maong balaod.

***

Ang Senado nihimog pakisusi sa maong balaod. Ang mga opisyales sa BuCor naglinya didto sa Senado aron manubag sa mga pangutana sa mga hamili nga mga senador.

Gipangayo sa mga senador ang listahan gikan sa BuCor kon si kinsa kadtong mga konbiktado sa heinous crimes nga nakagawas tungod sa maong balaod.

Di sila makatuo kay naapil sa listahan si Janet Lim Napoles, ang mastermind sa P10 bilyones nga pork barrel scam nga naglambigit sa daghang mga magbabalaod lakip na ang pilipin dinhi sa Sugbo.

***

Si Senador Richard Gordon, ang nangulo sa imbestigasyon sa balaod mahitungod sa good conduct time allowance (Republic Act No. 10592), niingon nga hayan mawad-an ang katawhan og pagsalig sa atong prison system.

Tiaw mo na, kon sakto pa ang report sa BuCor, si Napoles nakagawas na ug nagpahimus na sa minilyon ka pesos nga iyang nakurakot uban sa pakigkonsabo sa atong mga magbabalaod.

Unya wa pay klaro ang listahan sa BuCor. Ang akong kuyawan mao nga sa ilang listahan, hasta kadtong wa pa makonbikto, nakagawas na.