NIADTONG Agusto, gipasirad-an ni Manila Mayor Francisco Isko Moreno ang upat ka mga tindahan sa Manila nga namaligya og hair product nga hinimo ug gi-package sa Binondo, Manila, ang capital city sa Pilipinas.

Nasuko si Mayor Isko Moreno tungod sa label sa produkto nga Ashley Shine Keratin Treatment Deep Repair. Kay ang gibutang nga address sa packaging mao ang “1st Flr. 707 Ito Cristo St., San Nicolas, Manila Province, P.R. China.”

Basin kon ang naghimo niini, nga giingong mga Chinese nationals, nagtuo gyud nga ang Manila usa ka probinsya sa China kay sumala pa sa duha ka mga senador, mokabat sa upat ka milyon ang mga Chinese nationals ang ania na sa Pilipinas.

* * *

Si Senator Francis “Kiko” Pangilinan mipasaka sa Senate Resolution 558 niadtong Martes aron ipa-imbestigar sa Senate committee on national defense and security, peace, unification and reconciliation ang security implications sa pag-abot sa 4 milyones ka mga Chinese nationals sa nasod sukad sa 2017.

Matod pa ni Pangilinan, angay susihon kon usa ba kini ka “orchestrated ‘soft invasion’ of our country.” Makapaalarma kini, matod niya, tungod sa nagpadayong panagbangi tali sa China ug Pilipinas bahin sa West Philippine Sea.

Nahibaw-an ang pag-abot sa upat ka milyon ka mga Chinese nationals atol sa hearing nga gihimo niadtong Oktubre 20 sa Senate committee on women, children, family relations and gender equality nga gipangulohan ni Senador Risa Hontiveros.

* * *

Ang “soft invasion” mao ang termino nga gigamit ni Capt. Jim Fanell, kanhi intelligence chief sa US Navy Pacific Fleet, sa paghulagway sa istratehiya sa China sa pagsulod sa mga kabus nga silingang kanasuran pinaagi sa pagsuburno sa mga opisyal.

Matod ni Hontiveros, si ex-Justice Secretary Vitaliano Aguirre miluwat niadtong 2017 sa Department of Justice Order 41 nga nagtugot sa mga Chinese nationals nga makasulod sa nasod pinaagi sa visas-upon-arrival (VUA) nga luwatan sa Bureau of Immigration (BI).

Sa 4 milyones ka mga Chinese nga nisud sa nasod, 150,000 ang nigamit sa VUA. Matod ni Hontiveros, P40 bilyones ang nakurakot sa “pastillas scheme” ug sa VUA. Samtang si Pangilinan niingon, “The Philippines is for Filipinos. Some of our officials should not be blinded by money and exchange the Philippines for a few pieces of silver.”