Nipahimangno ang Department of Justice (DOJ) Office of Cyberctime (OOC) sa mga online lending companies (OLCs) batok sa paggamit sa “unfair debt collection practices” ug “cyber harassment” sa pagpaningil niadtong nakautang kanila.

Sa usa ka public advisory nga giluwatan niadtong Abril 23, 2021 (doj.gov.ph), ang DOJ-OOC miingon nga ang mga online lending ug financing companies nga magbuhat niini may tulubagong kriminal.

Gipagawas ang public advisory tungod sa nagkadaghan nga mga taho nga gipadangat ngadto sa DOJ-OOC bahin sa illegal nga binuhatan sa mga OLCs sa pagpamugos ug pagpanghulga sa mga utangan aron mobayad sa utang.

Mahimo silang mapasakaan og mga kasong kriminal kon buhaton nila kining mosunod nga mga illegal nga paagi sa pagkolekta sa utang:

(a) Pagsulod o pagtan-aw sa phone book/contacts’ list sa nakautang aron padad-an sila og messages kon malangay o di mobayad ang utangan; (b) Pag-post online sa mga personal ug sensitibong personal information sa utangan aron sa pagpakauwaw kanila; (c) Pagihulga sa utangan nga patyon o bun-ugon kon mapakyas sila pagbayad sa utang; ug (d) Paggamit sa binastos nga mga pulong pinaagi sa text message nga direktang gipadala ngadto sa utangan o sa mga tawo nga iyang references aron sa pagpakauwaw sa utangan.

Kining nahisgutan mga kalapasan sa mosunod nga mga balaod ug regulasyon: Republic Act (R.A.) No. 10175, ang Cybercrime Prevention Act of 2012; R.A. No. 10173, ang Data Privacy Act of 2012; sa Revised Penal Code (RPC); ug sa Securities and Exchange Commission (SEC) Memorandum Circular No. 18, series of 2019.

Atong tagsa-tagsaon ang maong mga kalapasan sa mga OLCs: (a) offenses against illegal access (Section 4(a)(1), R.A. No. 10175) ug cyber libel (Section 4(c)(4), R.A. No. 10175); (b) R.A. No. 10173, nga nagsilot sa unauthorized processing of personal information and sensitive personal information, (Section 25, R.A. No. 10173), processing of personal information and sensitive personal information for unauthorized purposes (Section 28, R.A. No. 10173) ug ang malicious disclosure (Section 31, R.A. No. 10173);

(c) sa mga probisyon sa RPC sa grave threats (Article 282), light threats (Article 283, grave coercion (Article 286), light coercion (Article 287), o unjust vexation (Article 287, paragraph 2) in relation to Section 6, R.A. No. 10175; ug kalapasan sa (d) SEC Memorandum Circular No. 18, series of 2019, ang Prohibition on Unfair Debt Collection Practices of Financing Companies and Lending Companies.

Ang public advisory sa DOJ-OOC nag-ingon nga ang mga kalapasan batok sa R.A. No. 10173, or the Data Privacy Act of 2012 mahimong ipasaka atubangan sa National Privacy Commission (NPC). Ang mga kalapasan batok sa R.A. No. 10175 ug sa Revised Penal Code mahimong ipasaka sa Office of the Prosecutor, National Bureau of Investigation–Cybercrime Division (NBI-CCD), o sa Philippine National Police—Anti-Cybercrime Group (PNP-ACG). Samtang ang mga lending ug finacing companies nga makalapas mahimong ikiha atubangan sa SEC. (edbarrita@gmail.com)