GIHAGIT og sinumbagay, bisag asa, bisag sa plenary, ni Negros Oriental 3rd District Rep. Arnolfo Teves Jr. si Deputy Speaker Luis Raymund Villafuerte. Nagsugod kini sa usa ka word war tali sa duha ka mga magbabalaod sa Viber.

Ang hinungdan mao ang pagkuwestyon ni Teves sa mas dako nga budget sa Department of Public Works and Highways (DPWH) sa lain-laing mga distrito, labi pa sa distrito ni Villafuerte sa Camarines Sur ug ni House Speaker Alan Peter Cayetano sa Taguig-Pateros.

Haskang alegreha kaha kon madayon ang sinumbagay nila ni Teves ug Villafuerte sa plenary, sa hawanan sa Kongreso. Apan di kaha tawgon ang House of Representatives nga 'house of boxing'?

* * *

Sa hearing sa House committee on appropriations sa giproponer nga 2021 budget sa DPWH, gibutyag ni Teves ang usa ka “hearsay” nga ang Taguig City gigahinan og kapin sa P8 bilyones samtang ang Camarines Sur adunay P11.8 bilyones sa DPWH. Dagko sab ang gahin sa mga distrito sa mga alyado ni Cayetano.

Apan sa usa ka pamahayag, si Villafuerte niingon nga ang alegasyon ni Teves kabahin sa plano sa kampo ni Rep. Lord Allan Velasco sa Marinduque nga madiskaril ang dinalian nga pagpasar sa 2021 General Appropriations Act ubos ni Speaker Cayetano.

Si Teves niingon nga ang iyang gibuhat way labot sa term-sharing agreement nila ni Cayetano ug Velasco. Ubos sa ilang “15-21 deal,” si Cayetano molingkod nga Speaker sa 15 lang ka buwan, samtang si Velasco, 21 ka buwan. Ang turn-over gitakda karong Oktubre o sayo sa Nobiyembre.

* * *

Wa madungog ang House of Representatives sa Pilipinas sa eksena sa mga magbabalaod nga magsinumbagay, di sama sa ubang nasod, bisan sa Estados Unidos. Apan dihay makapahinuot nga hitabo sa Kongreso sa Amerika.

Niadtong Pebrero 5, 1858, nag-away sa hawanan sa US Congress sila si Cong. Laurence M. Keitt sa South Carolina ug si Cong. Galusha A. Grow sa Pennsylvania atol sa debate sa pag-abolish sa slavery. Gituok ni Grow si Keitt. Niapil sa panag-away ang mokabat sa 50 ka kongresista.