HAYAN nga mosaka hangtod sa 50 porsento ang automated teller machines (ATM) fees human libkasa sa Bangko Sentral ng Pilipinas (BSP) ang unom na ka tuig nga moratorium sa ATM fee increases nga gipatuman niadtong 2013.

Gikatakda nga imbestigahon kini sa House committee on banks and financial intermediaries subay sa giproponer nga House Resolution No. 210 ni Makati Rep. Luis Campos Jr.

Apan daling namahayag ang BSP nga di makapataka ang mga bangko sa pagpasaka sa mga ATM fees. Kinahanglan pa silang manghid sa BSP. Mananghid pa lagi, pero kon tugtan, makapaumento gihapon kay wa na may moratorium.

***

Nabalaka si Campos nga maapektohan sa umento sa ATM fees ang 58 milyones ka mga ATM cardholders sa nasod. Labaw pang maapektohan ang mokabat sa 4.1 milyones nga mga minimum wage earners nga mokobra sa ilang suweldo kaduha sa usa ka buwan gikan sa ATM.

Ang survey sa mga ATM fees nagpakita nga ang mga bangko nagpahamtang sa gikan sa P10 nga sa P15 kada interbank withdrawal transaction ug P2 matag interbank balance inquiry.

Kay wa nay moratorium sa ATM fee increase, hayan molukso kini sa P15 ngadto sa P30 kada interbank withdrawal o kaha mas taas pa. Ang interbank withdrawal mao kanang mokobbra ka sa ATM sa bangko nga lahi sa imong gidepositohan.

***

Matod pa ni Kongresista Campos, nahimo nang usa ka monopoliya ang network nga nag-interconnect sa tanang 21,682 ka mga ATM sa Pilipinas. Ang bentaha lang sa mobopoliya sa ATM kay di na ka mag-atang sa taas kaayong linya kay sa mokobra ka gikan sa mga tellers.

Ang pangutana kon asa padung ang mga ATM fees. May lain pa, idugang sa ganansiya sa mga bangko nga niabot na og P110 bilyones sa unang unom ka buwan pa lang ning tuiga.

Gipahinumduman ni Surigao del Sur Rep. Johnny Pimentel ang mga bangko nga ang cash sa ATM, kuwarta nga hinuwaman nila gikan sa ilang depositors.