INIG bagting sa tungang gabii ugmang adlawa, matapos na ang tuig 2019 ug mosugat kita sa usa ka Bag-ong Tuig, sa tuig 2020. Daghang niingon nga morag nikilab lang ang tuig 2019. Morag lab-as pa sa atong panumduman ang selebrasyon sa bag-ong tuig.

Sa awit nga “Seasons of Love” gikan sa broadway musical nga “Rent,” nitumaw ang pangutana, “How do you measure, measure a year?” Apan giuna sa maong awit ang tubag sa maong pangutana, “Five hundred twenty-five thousand six hundred minutes.”

Ug di lang kay sa gidaghanon sa mga minutos sa usa ka tuig. Ang usa ka tuig pagasukdon usab sa mga pagsawop sa adlaw, sa mga tasa sa kape, sa mga katawa ug labaw pa sa gugma.

***

Apan matag sugat nato sa bag-ong tuig, daghan ang magpabuto og mga rebentador bisan pa kon nasayod sila nga delikado kini kay kon sila mabuthan, mahimo silang mawad-an og mga tudlo, masamdan o mabuta ba hinuon.

Ang labing delikado mao ang pagpabuto sa pusil. Dunay mga kaso sa mga tawo ug mga bata nga maigo sa stray bullet kon sa saag nga bala. Kini tungod kay ang bala, bisan ipuntariya sa ibabaw, pareho ra higapon ka kakusgon inig balik sa yuta. Unya “to whom it may concern” na.

Busa nipahimangno si Police Colonel Roderick Mariano, hepe sa Cebu Police Provincial Office (CPPO), sa iyang 1,800 ka mga police officers sa tibuok lalawigan sa Sugbo nga taktakon sila sa serbisyo kon magpataka sila sa pagpabuto sa ilang mga pusil.

***

Matod ni Colonel Mariano, kinahanglang seguraduhon sa station commanders nga ang ilang mga sakop di mogamit sa ilang pusil isip hulip sa mga firecrackers sa selebrasyon sa Bag-ong Tuig.

Ang mga sakop sa kapulisan nihimo na usab og usa ka covenant, panaad ug kasabutan, nga di magpataka sa pagpabuto sa ilang mga pusil atol sa New Year. Ug kon magpabuto man gani, himuon ang paspas nga imbestigasyon aron mataktak dayon sa serbisyo.

Ang ilang target sa CPPO - zero victims sa firecrackers ug indiscriminate firing sa selebrasyon sa Bag-ong Tuig. Sa miaging Pasko, ang gusto untang magpabuto og firecrackers gibaraw sa bagyong Ursula.