MIABOT sa 226 ka mga tawo ang nangamatay sa coronavirus disease 2019 (Covid-19) dinhi sa siyudad sa Sugbo gikan sa Agusto 1 hangtod sa 25. Hapit kini sa tulo ka pilo sa 88 nga namatay sa Covid-19 sa Hulyo, matod sa Emergency Operation Center (EOC) sa siyudad.

Kutob sa Agusto 25, 1,192 na ka mga tawo sa siyudad ang namatay sa Covid-19. Kon nisaka ang nangamatay, namatikdan nga nikunhod usab ang mga aktibong kaso niini, matod ni Cebu City Councilor Joel Garganera, deputy implementer sa EOC.

Apan di angay nga mokompiyansa, matod niya, kay tag three digits pa ang mga kaso nga natala matag adlaw. Ang mga dakbayan sa Sugbo, Mandaue ug Lapu-Lapu ug laing 13 ka mga dapit ubos gihapon sa modified enhanced community quarantine hangtod (MECQ) sa Septiyembre 7, matod sa Malacañang.

Ang Visayas Covid-19 Vaccination Operations Center (VVOC) niingon nga sa 1,004,760 ka tawo nga nabakunahan sa unang dose sa Covid-19 vaccines sa Central Visayas, 5,120 lang (0.51 porsiyento) ang nakasinati og minor adverse events following immunization (AEFI) ug 53 lang (0.005 porsyento) ang dunay serious AEFI kutob sa Agusto 24.

Si Dr. Mary Jean Loreche, tigpamaba sa VVOC, niingon nga 981 lang (0.13 porsiyento) sa 750,340 ka tawo nga fully vaccinated, ang nitaho og minor AEFI, samtang 14 lang (0.0018 porsyento ang nitaho og serious AEFI.

Apan wa magpasabot, matod ni Loreche, nga kadtong dunay serious AEFI namatay tungod sa bakuna. Ang buot ipasabot sa serious AEFI case, matod niya mao nga ang usa ka tawo nga nabakunahan nagkinahanglan og medical checkup o naospital tungod sa allegic reaction o nitukar ang iyang sakit.

Ang gusto natong masayran mao nga wa bay namatay sa gibakunahan dinhi sa Central Visayas (CV). Si Loreche niingon nga dunay namatay sa gibakunahan, apan dili ang bakuna maoy namatyan.

Sa unang dose sa serious AEFI cases nga gi-review sa board, buhi ug pito ang patay apan masakiton na daan.