KITANG tanan dunay mga damgo ug pangandoy para sa kaugalingon ug sa atong kabanay. Ang uban kab-uton ang tanan hasta langit para lang makuha ug magtuman kini.

Lain-lain ang mga paagi, apan kon imong huna-hunaon, bisag unsa pa ka mahalon o barato imong sakyanan, pareho ra gihapon nga dalan ug gilay-on sa destinasyon ang tadlason. Bisag imong ilimnong bino tag P15,000 ang botilya o baratohong Bino Kulafu, parehas ra gihapon nga hang over kon mahubog.

Bisag unsa pa ka dako sa imong mansiyon o ka gamay sa imong bahay kubo, kon ikaw kanunay nag-inusara o magul-anon, parehas ra gihapon ang bation.

Bisag sa first class, business class o economy imong lingkuranan sa barko o eroplano, kon simbako palayo ma crash kini, tanan ang madisgrasya, way pili.

Hinaot imong ma-amgo nga ang tinuod nga kalipay wa magagikan sa mga materyal nga kabtangan, busa palangga-a ug atimana imong pares (bana o asawa), mga anak, mga higala, buddy-buddy, igsuon nga kanunay imong makauban sa kalipay ug kasakit, kauban nimo mangatawa, manganta, maka-estorya. Kana maoy tinuoray nga bahandi sa kalipay maong sa gagmay pa ang atong mga bata, angay na tudluan kon unsaon para magdako nga malipayon, dili para madato aron ilang masabtan ang importansiya sa mga butang sa palibot ug di ang kantidad niini.

Dunay panultihon nga nag ingon “eat your food as your medicine otherwise you have to eat medicine as your food.” Pasabot, kaon og masustansiyang pagkaon aron di masakit kay kon masakit na, ang tambal nay himuong pagkaon.

Timan-i sab nga ang tawo nga tinuoray nga nahigugma nimo, di gayod kini mobiya bisag unsa pay mahitabo kay maningkamot man kini pagbuhat sa tanan para nimo.

Busa sugdi na pag-abre kining 5 ka gasa kay gawas nga libre kini, makaayo pa gayod sa atong panglawas: ang kainit sa adlaw nga naghatag og Bitamina D, ang saktong pagpahuway ug katulog, regular nga pag-ehersisyo, saktong diet, kumpiyansa sa kaugalingon, ug mga suod nga higala.