SAYOD kita nga ang sapi ug bahandi di basihan sa kalipay ug kaharuhay maong bisan pa man sa kadaghang kakuwangan naa pa gihapoy mo-ingon nga bahalag saging basta loving o gamit sa pulong pobreng hamugaway.

Diay akong mga kinuykuyan nga mga pa-agi kon unsaon pagpuyo og simple apan kontento ug malipayon nga kinabuhi.

Numero uno kining ‘born to be rich’ nga pagpuyo ug gasto nga subra pa sa kinitaan. Busa, ayaw pagsegi og pamalit o gasto nga mas molabaw pa sa kinitaan kay seguradong mabuslot ang bulsa.

Ikaduha, bayari imong mga utang, bahalag hinay o ginagmay hangtod ma-impas. Mas maayong motultol og bayad kaysa panukton nga medyo maka-uulaw. Ang mahitabo kung likay-likayan ang gi-utangan, posibli nga di ka na ka usab sa sunod.

Kat-uni ug permanentiha ang kina-iya sa pag-uli sa mga butang nga hinuwaman aron di magmakuli og balibad ang nagpahuwam sa sunod. Sahi pa bitaw, kon ikaw mismo ang nabiktima unya idagan ang imong butang nga gipahuwaman, di ba?

Sunod, ipanghatag ngadto sa uban labi na adtong mga nagkalisod, imong ubang mga subra o mga butang nga wa na gamita o kinahanglana. Gawas nga mahinlo imong panimalay, makatabang sab ka ngadto sa uban.

Way kumo ang pagpa-ubos. Ayaw i-bandilyo imong mga kabtangan ug bahandi aron ka daygon. Ang tinu-uray nga adunahan di na mangugat og anunsiyo nga siya tubigan.

Ayaw pagsegi og pamasangil o pamalikas sa uban. Dawata ang kasaypanan bisag unsa pa ka gamay aron sayon ug dali maka move-on.

Mas dak-on ang dughan ug dunggan sa pagpaminaw kaysa baba pagsulti. Ingon bitaw sa English, the more you talk, the more mistakes. Be on time, sahi pa kung ikaw ang pahuwaton, di ba makasapot?

Ayaw daginuta o paningti ang mga gagmay ug way bili nga butang. Nag usik-usik ka lang sa imong oras ug emosyon labi na kon imo kining hatagan og importansiya. Mao sab ning rason nganong kanunay saputon. Katapusan, hatagi imong kaugalingon og oras kon ‘Me Time’ aron ka makapahuway ug malipay.