Kaniadtong nagtrabaho pako sa Department of Social Welfare and Development (DSWD) dinhi sa Rehiyon 7, di ko kalimot sa usa ka inahan nga nanawag nako kay gusto na niyang ipasagop iyang pusosong anak sa gobyerno kay di na niya makaya og disiplina.

Murag di katuhoan nga dunay mga ginikanan nga napul-an ug gikapoy na og binuhi sa ilang mga anak labi na kung badlungon. Duna say uban nga nag-agwanta sa stress ug gitulon na lang ang kauwaw sa badlungon nga anak bisag hago ug hapo na kaayo kay mauwaw man sudyaan nga di kabalo mo amuma ug padako og anak.

Kung duna pa lang lagi eskwelahan nga magtudlo sa mga ginikanan sa insaktong paagi sa pagpadako og bata, segurado ko nga daghan ang mopa-enroll apil nako kay di lalim magpadako og bata.

Sayon ra ang pagmabdos ug pagpanganak apan ang pagpadako maoy sarang lisura.

Duna koy mga nakoykuyang mga tips apil ang akong kaugalingong kasinatian isip inahan og kaluha kung unsaon pagmatuto sa bata sugod sa sayong pangidaron.

Ako mismo nagtuo nga way ‘problem child’ kundi ‘a child with a problem’, pasabot nga way bata nga gipakatawo’ng nagtangag daan og problema kundi bata nga kasamtangang dunay gipas-an nga problema o isyu.

Kung duna gali kay mamatikdan nga ang bata naay gidala-dalang isyu, andama na daan imong dughan ug dunggan sa pagpaminaw. Likayi ang pagderitso og husga. Ayaw sab pataka og hatag og tambag kung wa kini pangayu-a.

Ayaw surangsuranga o dali-dalia ang bata sa pagsulti sa iyang bug-at nga gibati kay di kini sayon para nila.

Isip ginikanan, atong patas-an atong pasensya. Ayaw kahingawa pagsulti sa imong tinuoray nga gibati ug ayaw gayod pagpamakak kay kini sila makabalo kung ikaw nagtug-an sa tinuod.

Ayaw sab pagsaad kung di nimo kini matuman. Be a good example. Matod pa bitaw sa panultihon ‘sa mata ng bata ang ginagawa ng matanda ay tama’.

Pag-gahin og family time unya ayaw limiti ang imong paggakos, halok ug sulti og ‘I love you’ kay gawas nga libre, makapalipay sab kini sa pagbati.