SA AKONG gidugayon nga pagserbisyo sa gobyerno isip Human Resource and Personnel Management Officer, maka-ingon ko nga di na maihap ang lain-laing kina-iya ug batasan sa mga empleyado nga akong naka-uban. Dunay mga hambogero, isipan, tamaran unya duna say uban nga mga matinud-anon, kugihan ug matinabangon.

Ang pag-ila ini nila nakatabang sab nako pagpili ug bahig sa mga empleyado kung asa sila ipahimutang nga haom sa posisyon o pagpili sa mga badlungon nga angay taktakunon.

Tungod ini, naghimo ko og kaugalingong listahan sa akong mga kaubang mga mamumuo nga angay likayan kay lisod ikatrabaho:

Numero una kining kina-iya nga crab mentality. Kini sila di magpa- pilde ug gusto kanunay nga maoy mag-una kay sama sa lambay kusog kining mamira kay mahadlok malabwan.

Kusog sab ni silang manu-ot labi na kung ma-apiki. Dayon kini og pamasangil sa uban panahon nga kini sila madihado sa iyang baruganan o gitrabaho.

Kini sab sila kusog mangangkon sa trabaho sa uban labi na og dalaygon. Feeling bida sab ni sila kanunay sa mga ginbuhaton o kalihukan unya ikaw nga nahibalo sa tinuod mao na lay mauwaw. Kusog kini mag leader-leader bisan way kahibalo o kahanas kay magpakitang gilas man sa amo.

Wala sab kini silay paki-alam tungod kay ilang kaugalingon raman ilang gihuna-huna, di kini makig tambayayong sa uban. Isipan, iya-iya ug ako-ako ni ilang prinsipyo bahala og nagbalingtuwad na ang uban.

Palayo sab ining mga perfectionista kay para nila sila ray kanunay insakto ug utokan. Di kini maminaw og mga suhistiyon ug salmot sa ubang huna-huna kay ilang feeling sila ra’y importante.

Kung ma-palpak sa ilang trabaho kusog kining mamasangil ug mamasa sa basol sa uban.

Watch out sab kay kung sa ilang tan-aw ka pildihon na o makakita nga mas maayo ang uban, hinay-hinay dayon kini og atras hangtod nga mo undang kay mawad-an naman og gana.