APAS-sumpay sa akong lindog sa miaging Sabado, karong adlawa akong tukion kung unsay posibling mahitabo sa bag-ong magti-ayon kung kini mangipon sa ginikanan o magkina-ugalingon.

Tinuod nga maka menus-gastos kung mangipon kay mabahin-bahin man ang bayranan apan usahay mao sab kini maka-ingon sa panagbangi og dayong kaguba sa relasyon kay di kalikayan nga dunay manghilabot o manghimantay sama sa ugangan, bayaw o umagad labi na sa pagpadagan sa panimalay o pagpadako sa mga bata.

Bahalag gasto gamay kung magkina-ugalingon, ang bag-ong magti-ayon makat-on pagbahig-bahig sa ilang kita bisag unsa ka gamay ug ma-aghat/makat-on sa pagdaginot ug ma responsabli.

Apan kini wa magpasabot nga wa na sila magkinahanglan og abag. Kung dunay matabang o matampo ang ginikanan labing maayo para di magkabikos-bikos sa kalisod.

Ang Balaang Basahon nga ma basa sa Genesis 2:24 nag-ingon nga kung magpakasal ... ‘a man will leave his father and his mother and be united to his wife, and they will become one flesh’. Mao ni gusto sa atong manunubos nga magkina-ugalingon kay di siya gusto nga mahitabo ang kagubot o kaguol kung mangipon kay ubay-ubay man ang problemang mahatag ini kaysa magkina-ugalingon.

Bug-at ug lisod sa pirmiro ang magkina-ugalingon apan sa tinuod dako kini og matabang kay mo samot man ka hugot ang relasyon sa magti-ayon ug magka-sinabtanay kay duna man silay pribasiya ug makapagusto sila sa ilang ginbuhaton o lakaw nga way nagtan-aw.

Busa kung di pa gayod andam magkina-ugalingon, ayaw lang usa pag-minyo.

Apan kung di malikayan unya dunay bug-at nga rason nganong temporaryong mangipon (kuwang sa kita nga ikasugagod para sa inadlaw-adlaw nga gastuhan, di pa kasarang o way maka bantay sa mga bata), andama na lang daan ang kaugalingon sa uma-abot nga problema. Kung ingon man gali ini, paninguha nga makakita ka og part time job o laing kapaninguhaan og iklaro daan kung hasta kanus-a ang temporaryong panag-ipon aron way sakit sa dughan.