NAAGHAT ko paghisgot ning lindog human nabasa nako ang artikulo sa lecture ni Dr. Cornelio Banaag, Jr., inilang psychiatrist sa atong nasod.

Halos 17 na ka bulan ang milabay sukad kita tanan gipahimangnuan sa pagpuyo ug urong sa atong tagsatagsa ka panimalay pagsugod sa Covid-19 aron di kini mosamot og katap.

Karon nga nagsugod na unta ang pagpamakuna batok sa Covid-19, sipa sab nga niabot ang Delta variant nga nakapaminghoy sa tanan. Ang ubang lugar balik na sab ka lockdown og kadaghanan murag naka-house arrest, matod pa.

Bisan pa man sa kalisod sa atong kahimtang, padayon gihapon ang pagpamakuna kay dako kini og matabang pagpanagang aron dili magrabihan kung ugaling matakdan ini.

Alingasa na kaayo ang kadaghanan labi na ang mga gurs kon senior citizens.

Unsaon man para atong mapalingaw-lingaw ang kaugalingon samtang maghuwat nga mohinay o mawala na kining mangtas nga kagaw?

Labing unang tambag ni Dr. Banaag, socialize online sa mga paryente, suod nga mga higala gamit ang electronics o digital nga gadgets sama sa telepono, cellphone, ipad unya mag-download og mga App sama sa Viver o WhatsAppt.

Makiuso sama sa mga batan-on pag-apil-apil sa social media sama sa Facebook o Twitter kay pina-agi ini ma updated sa mga nag-unang balita ug kalambuan sa palibot bisag naa ra ka sulod sa balay.

Pagpabiling cool, ayaw sige og kasuko, sapot, o pangasaba kay kini maka-high blood labi pa kay init ang panahon.

Kuha-i gamay imong mga buluhaton ug obligasyon aron di mabug-atan.

Kung mahimo, palayo sa saba ug gubot nga mga lugar. Mas maayong magpabukid aron way samok unya maka-relax, simhot sa mga buwak o hanggap og preskong hangin.

Buhata ang imong gustong buhaton samtang makaya pa. Ayaw palabi og kumkom sa tinigom, gastuha kini para mahayay ug malipay samtang nagginhawa pa.

Hinumdumi, life is short. Way usa nato nga makatag-an kung kaanus-a ta mo-expire sa atong lawasnong kinabuhi. Sa katapusan, ihangad sa kahitas-an ang tanan.