Bag-o lang nabiyuda akong klasmet human kalit nga giataki sa kasingkasing iyang bana. Sa katapusang higayon paghatod sa lubnganan, iya ming gipahinumduman sa pagmahal sa mga kapikas kay di matag-an ang panahon kon kanus-a sila mawala sa atong kiliran.

Karong adlawa atong hisgutan kon unsaon pagpabalik sa maayong relasyon human mag-away ang magtiayon.

Sayod kita nga di malikayan ang panagbangi sa usag-usa labi na og kanunay mag-uban sa tanan halos 24 oras. Unya kasagarang ending ini dunay masakitan o maghilak.

Diay akong mga ipaambit nga Green Flags sa relasyon nga makatabang paghusay sa away.

Unang likayan, kon mahimo, ang pag walk-out kon mag-away labi na og di magkasinabot kay mosamot man hinuon kagubot kay mag-umido naman ang dughan sa kasuko kay wa makapadayag sa gibati sama sa bulkan nga wa ka buto.

Sunod komunikasyon. Ang pagpangluod, layas ug bungolbungol makapasamot hinuon sa away . Angay lingkuran ang sitwasyon aron ang usag-usa makapadayag sa ilang mga punto ug gibati nganong naingon unya makapaminaw sab sa rason kay kita tanan naa may kakuwangan.

Dak-on ang dunggan ug dughan sa pagpaminaw aron masabtan ang usag-usa. Unya kon maminaw man ugali, ayaw pakganga ang kaestorya aron magkasinabtanay. Di sab dapat magdungan og tubag unya magsiyagitay pa gayod.

Pangayo og panahon nga ikaw sab makapadayag sa imong parte. Kon mahimo, ipaubos ang gikusgon sa tingog unya buhaton kini sa lugar nga pribado, sama sa lawak, aron di makadungog ang mga bata nga way labot sa panagbangi.

Unya kon duna man ugali sayop o kalapasan nga nahimo, ayaw pagmakuli pag-angkon ug dawat sa sayop unya pangayo og kinasingkasing nga pasaylo.

Likayi ang deritsong pagpanaway. Panamini una imong kaugalingon una ka moabri sa imong baba.

Recess! Kon kamong duha init og binuga sa baba, break una bisag mga 30 minutos lang. Lakaw ug hanggap una og preskong hangin para maka huna-huna og insakto unya ma cool-off sab kadiyot ang sitwasyon una mobalik og estorya.