DI mahitsura ang tibuok lawas ug nawong ni Manny (tinuod ngalan gitago) dihang aksidenting nabangga ang gimanihong motor sa usa ka 10-wheeler nga truck sa may dakbayan sa Mandaue pipila ka tuig na ang milabay.

Nahingangha ko kay paglabay sa pipila ka buwan sukad siya na admit, ang iyang asawa man hinuon nga way puas, adlaw ug gabiing nag-atiman ug bantay niya sa ospital, maoy namatay .

Subo palandungon kining bating balita apan angay hinuktukan ug tukion ang hinungdan.

Akong gisusi iyang kalit nga kamatayon nganong ang nagbantay sa masakiton naman hinuoy nakabsan sa kinabuhi?

Gibaliwala ang ka gutom og nataligam-an pag-atiman sa kaugalingon samtang nagbantay sa iyang bana ang numero 1 rason nganong siya nagka-ulcer sa tinai unya sa ngadto-ngadto midaghan, midako ang mga abnormal nga cancerous cells nga nahimong tumor nga kusog mikatap sa ubang parte sa lawas.

Ika-3 nga makamatay’ng sakit kining Colon ug Rectal Cancers maong gi-awhag sa mga doctor ang pagpa-check-up labi na kung 50 anyos na pataas.

Kung mag-abot ang Colon ug Rectal cancer nga anaa nahimutnag sa tumoy sa rectom (guwa-anan sa hugaw sa lobot) tawag ini, colorectal cancer na.

Kini nga mga klase sa cancer ika-duha sa listahan sa komon nga makamatay’ng sakit. Salamat sa tabang sa mga modernong kahimanan kay nagka-anam na og kunhod ang gidaghanon sa nangamatay ini kay dali nang mahibaw-an. Gani lang, kuwang pa gihapon ang gihimong mga pagtuon sa pagpangita og tambal nga makasumpo ini.

Maayo na lang kay dunay alibyo. Ang Universidad sa Adelaide, Australia dunay bag-ong nadiskubring alternatibong tambal nga daghang kaayuhan gawas sa cancer. Kini ang Lauric Acid nga makuha gikan sa lana sa lubi. Ang lubi nga gitawag sa Inglis og ‘Tree of Life’ maka-sugpo 93% ining mga cancer cells. Makatabang sab kini pagkumbati sa ubang impeksyon apil ang mga sakit sama sa diabetes, Alzheimer, osteoporosis, hepatitis, sakit sa bato og kasing-kasing.

Busa, ayaw dugaya! Higop na sa tam-is ug lamiang sabaw sa lubi.