Nakamatikod ka ba nga naay uban nato nga dali ug sayon ra kaayong makalitok og mahait nga pulong ug makapanaway sa mga deperensiya sa uban apan wa gali ka panamin sa kaugalingon kon siya mismo sawayunon sab?

Matod pa sa akong higala, mas maayo, mapilde.

Bitaw, karong adlawa atong tutukan atong kaugalingon pagtan-aw kon kita salawayon ba sab o toxic ba ang kaugalingong personalidad.

Unsaon man pag-ila kon ikaw mismo dunay toxic nga personalidad.

Kining mosunod maoy mga timailhan:

Pinaka-una ang pagka reklamador. Segi ka lang og reklamo bisag way basihan o klarong punto o igong rason nga ikareklamo. Unya ra ba kon pangutan-on wa man say ikatampo.

Ikaduha, segi ka lang og kasuko. Bisag gamay ra nga butang imong padak-on o himuong isyu nga di man unta angay ikasuko. Ang kapait kay usahay ikaw ra sab mismo ang nakaingon sa imong kasuko og di ang uban.

Ikatulo, user. Maayo ka lang sa ubang tawo kon duna kay tuyo o gikinahanglan apan kon mahuman o makuha na nimo imong gusto, ibasura na nimo imong pagtagad nila kay wa naman nimo sila kinahanglana.

Para sab nimo ang tanan kompetensiya ma dagway, kabtangan, trabaho o sapi. Maningkamot gayod og rason kay di man lagi pa pilde kay para nimo ikaw ang kanunay nga winner.

Yaga-yagaan nga personalidad. Makantalitahon kun sarcastic kanunay. Dayeg dalang yaga-yaga nga klarong tinuyo ug di tinuod o kinasingkasing.

Uhaw sa pagdayeg ug pagtagad. Gusto ka kanunay nga star maong maghimo-himo dayon og mga panghitabo o eksina nga makabira og atensiyon para ma-focus ang spotlight nimo kay lagi kanunay man nga uhaw sa pagtagad ug pagdayeg.

Insultador unya kusog magpakitang gilas aron ingnon nga dunay kahibalo sa tanan unya makiglalis pa sa iyang baruganan aron ingnon nga utukan.

Angay na manamin sa kaugalingon aron makapangayo og tabang sa mga propesyunal aron maagapan ug di mahurot og panibat imong mga higala ug kapamilya.