Binasi sa Genesis 12:1-4; Salmo 33; 2 Timoteo 1:8-10; Mateo 17:1-9

MAY mga yugto sa kinabuhi nga mahimo kitang maglutaw. Kanang bag-o pa kitang magmata, maglutaw kita ilabina kon kadlawon pa. Kanang malapasan kita sa gutom, maglutaw kita kay magluya man kita. Mahimo sad nga kon gisugot ang usa ka lalaki sa iyang gipangulitawhan, maglutaw pod siya sa kalipay.

Daw naglutaw pod si Pedro sa ebanghelyo sa dihang miingon siya: “Ginoo, maayo nga ania kita dinhi; kon buot nimo, maghimo ako dinhi og tulo ka mga tolda, usa alang kanimo, usa alang kang Moises ug usa alang kang Elias”. “High” kaayo siya kay dili lamang mitungas sila sa usa ka bungtod kondili misanag ug nabag-o ang panagway ni Jesus unya mitumaw pa sila si Moises ug Elias. Kining si Moises, sa libro sa Genesis, gitawag sa Dios aron mahimong sinugdanan sa dako nga nasod ug nga ang tanang katawhan sa tibuok kalibotan makakaplag og bendisyon pinaagi kaniya.

Makadasig ang pagpadayag ni Jesus sa iyang pagka-Dios. Mao nga buot ikahon ni Pedro ang maong kasinatian. Maghimo siyag mga tolda aron magpabilin ang duha ka mga iladong tawo – si Moises ug si Elias – uban sa iyang amo nga mao si Jesus. Nindot ang maong laraw apan wala magkatugma sa plano sa Dios. Wala tagda ang iyang gisugyot; hinunoa: “Kini mao ang pinalangga kong anak nga akong gikahimut-an. Pamatia ninyo siya,” ang tubag sa Ginoo. Dili diay si Pedro sa iyang galutaw nga kahimtang ang paminawon, kondili si Jesus.

Makita sa suwat ngadto kang Timoteo ang nagpaluyo sa pagkabag-o sa panagway ni Jesus. Nagkanayon ang sulat: “Pinangga: batoni ang inyong pag-ambit sa kalisdanan tungod sa ebanghelyo inubanan sa kusog nga nagagikan sa Dios”. Ang tumong sa “transfiguration” mao ang paghatag og kusog nga gikan sa Dios ngadto sa mga tinun-an. Bisan pag morag nahikalimtan nila ang maong gahom panahon sa pasyon ni Jesus, miabot ra ang panahon nga nahinumdoman nila ang maong panghitabo ug naghatag kini og kusog sa mga sumusunod ni Cristo.

Usahay kon galutaw kita pataka lang kita og sulti. Apan wala kini magpasabot nga ngil-ad kanunay ang maglutaw. May pagbati sad baya ang tawo. Ang mahinungdanon mao nga ipunting nato ang atong mga mata ug dalunggan ngadto kang Cristo aron dili kita mawani sa pagbati ug klaro ang atong padulngan ug mga lakang.

Mopaduol ba kita sa Dios sa panahon nga kita galutaw?