MGA manhid lang seguro o walay emusyon ang dili bation og kabalaka sa pagpaubos sa dakbayan sa Sugbo ug Mandaue sa Alert Level 3 gikan sa Alert Level 2 sugod kagahapon, Enero 14. Nagpasabot kini nga mitaas ang kaso sa coronavirus disease 2019 (Covid-19).

Lakip na sa Alert Level 3 ang Lapu-Lapu City, Cebu province, Bohol ug Negros Oriental sugod sa Dominggo, Enero 16.

Dili kita magpalabi sa kabalaka apan dili mokompiyansa pinaagi sa pagmintinar sa himsog nga panglawas ug mosunod sa minimum health standard sa publikong dapit.

Nganong dili kita magpalabi sa kalabaka? Ang atong awtoridad ug kita mismo duna nay igong kasinatian sa virus. Ang 4th wave sa Covid-19 gituhoan nga mugna sa variant nga Omicron ug sumala sa kasinatian sa ubang nasod, paspas tuod motakod ang maong variant apan dili ingon kagrabe sa orihinal nga virus. Dugang pa, gawas sa halapad nga programa sa bakuna, dunay tambal na nga namugna.

Niadtong Oktubre 2020, ang Food and Drug Administration (FDA) sa Estados Unidos niaprubar sa antiviral drug nga Remdesivir sa Pfizer sa pagtambal sa pasyente sa Covid-19. Dili lang kini apan dunay ubang tambal nga nakaplagan usab sa United Kingdom, Russia ug bisan sa Germany. Ang Remdesiver nakaabot na sa Pilipinas apan, ang awtoridad nakatutok sa paningkamot sa programa sa pagpamakuna.

Ang kagamhanan sa dakbayan sa Sugbo ug Mandaue wala mokonsiderar sa pagpahamtang og lockdown nga napamatud-an nga negatibo sa hinayhinay nang pagbangon sa ekonomiya labina nga bag-o usab kitang gikusokuso sa bagyong Odette, usa sa gitumbok nga hinungdan sa pagsaka sa kaso sa Covid-19 tungod sa panagdasok sa evacuation centers ug taas nga pila alang sa mga nag-unang serbisyo.

Dili kita mokompiyansa. Manalangin sa Sr. Sto, Niño nga molurang na kining 4th wave ug mapapas na ang pandemiya sa Covid-19.